“Hech kim tappi yoqish kerak deyayotgani yo‘q. Gaz ballonlar yetarli” — Energetika vazirining o‘rinbosari

Energetika vazirining o‘rinbosari Behzod Normatov ayrim tadbirkorlarning gaz ta’minotidan uzilishiga bildirgan e’tirozlariga javob qaytardi, deb yozmoqda “Gazeta.uz”.

“Hech kim tappi yoqish, ko‘mir yoki o‘tin ishlatishga o‘tiladi, degani yo‘q. Gaz balloni sotib olinadi va unga siqilgan gaz to‘ldiriladi, so‘ngra oshxonalarda tabiiy gaz ta’minoti o‘chirilib, maxsus shlang orqali ballonga ulanadi, shunda muammo ham bo‘lmaydi”, — degan u.

1-noyabrdan O‘zbekistonda xo‘jalik yurituvchi subyektlar, xususan, kafe va restoranlarning tabiiy gazdan foydalanishiga cheklovlar belgilangan. Energetika vazirligi ushbu chora zarur ekani, sababi kuz-qish mavsumida ijtimoiy soha obyektlari hamda aholini tabiiy gaz bilan ta’minlashga asosiy e’tibor qaratish lozimligini qayd etgan.

Gaz ta’minotining joriy infratuzilmasida tabiiy gazning teng taqsimlanishi va intensifikatsiya qilingan iste’mol bo‘yicha imkoniyatlar cheklangan. Shu sababli ham gaz ta’minotini me’yorlashtirish uchun vaqtinchalik maxsus choralar ko‘rilmoqda, bu orqali uylar, kvartiralar, maktablar, maktabgacha ta’lim tashkilotlari hamda shifoxonalarga gaz ta’minotini yetkazib berish mumkin.

Shuningdek, Energetika vazirligi tadbirkorlarning hammasi so‘nggi yillarda O‘zbekistonda siqilgan gaz, ko‘mir va boshqa muqobil energiya manbalaridan foydalanish orqali tabiiy gazni tejash dasturi amalga oshirilayotganidan xabardorligini qayd etgan.

Avvalroq Spot nashri tadbirkorlarning vujudga kelgan muammolar nafaqat narx-navoga, balki biznesga ham kuchli zarba berib, ovqatlanish sohasini investitsiyalar uchun noqulay yo‘nalishga aylantirishi haqida fikr bildirayotganligini yozgan edi.

“Yoshlar” telekanalining “Davr” informatsion dasturida ham tadbirkorlarning bu boradagi noroziliklari xususida lavha efirga berilgan. Ovqatlanish muassasasi egalaridan biri Nargiza Fayziyeva tadbirkorlarning gaz ta’minotidan noyabr boshidan uzib qo‘yilishiga tayyor emasligini bildirgan.

“Birinchida, bunda ishchi o‘rinlari qisqarib ketadi. Ikkinchidan esa, tushum kamayib ketishi mumkin”, — degan tadbirkor ayol.

Yana bir tadbirkor Alisher Odilov kompaniyasida 300 dan 350 nafargacha xodim ishlashi, gaz bir kunga o‘chib qolsa ham, xodimlari ishsiz qolishi, davlat budjetiga soliq tushumlari to‘xtatishini aytgan.

Energetika vazirining o‘rinbosari Behzod Normatov tadbirkorlar bilan kelishuvlarda ularga uch oyga yetadigan zaxira yoqilg‘isini g‘amlab qo‘yish mas’uliyatini yuklaydigan band mavjud ekanini qayd qilgan.

“Ya’ni barcha ulgurji iste’molchilar, biznes subyektlar bundan xabardor. Xabari yo‘qlar kelishuvni topib, qayta o‘qib olishi mumkin… Cheklovlardan maqsad ularni gaz ta’minotidan to‘liq uzib qo‘yish emas. Hech kim tappi, ko‘mir yoki o‘tin yoqishga o‘tilsin deyayotgani yo‘q. Gaz balloni sotib olinadi, unga siqilgan gaz to‘ldiriladi, so‘ngra oshxona tabiiy gazdan uzilib, gaz balloni maxsus shlang orqali ulab qo‘yiladi. Muammo yo‘q”, — degan vazir o‘rinbosari.

Televideniye orqali efirga berilgan lavhada mutaxassis gazning aholi uchun yetarli darajadagi hajmda tarqatilayotgani, biroq ayrim tadbirkorlarning gazni o‘g‘irlashi tufayli yoqilg‘i kerakli manzilga to‘liq hajmda yetib bormayotganini ta’kidlagan.

“Raqamlashtirish bo‘yicha keng ko‘lamli ishlar amalga oshirilmoqda, onlayn hisoblagichlar o‘rnatilmoqda. Davlat har bir uyga o‘z hisobidan gaz hisoblagichini o‘rnatmoqda va buning uchun 500 million dollardan ziyod mablag‘ sarflandi. Hisoblagichlar kelajakda bu kabi o‘g‘rilarning harakatlaridan boshqalar ziyon ko‘rmasligi uchun o‘rnatilyapti”, ― deydi Normatov.

Avvalroq Behzod Normatov 2020-yilda “Lukoyl” O‘zbekiston ichki bozoriga 5 milliard kub metr gazni realizatsiya qilinganini bildirgandi.