O‘zbekistonda tartibga solinmagan serqatnov piyodalar va velosipedda harakatlanuvchilar uchun o‘tish yo‘llarida maxsus svetoforlar o‘rnatiladi

Vazirlar Mahkamasining “Aholining sog‘lom turmush tarzini qo‘llab-quvvatlash va jismoniy faolligini oshirishga doir qo‘shimcha chora-tadbirlar to‘g‘risida”gi qarori qabul qilindi, deya xabar bermoqda “Kun.uz”.

Qarorga muvofiq:

• Xalq ta’limi vazirligi Jismoniy tarbiya va sport vazirligi bilan birgalikda hududlarning o‘ziga xos xususiyatlari, aholining qiziqishi va xohish-istaklaridan kelib chiqib, umumta’lim maktablarini kamida bittadan ustuvor, istiqbolli, rivojlanayotgan, shu jumladan milliy sport turlariga ixtisoslashtiradi;

• umumta’lim maktablarining sport turlariga ixtisoslashuvidan kelib chiqib, ularning har birida har oyda kamida bitta sport turi bo‘yicha sport musobaqalari o‘tkazilishini ta’minlaydi.

Shu bilan birga, 2021-yildan boshlab 22-sentabr mamlakat bo‘yicha “Avtomobilsiz kun” sifatida e’lon qilindi hamda shu kuni shaxsiy avtomobilda harakatlanishdan ixtiyoriy ravishda voz kechish (maxsus texnikalar, taksi va yetkazib berish hamda tibbiy tez yordam uchun xizmat ko‘rsatadigan texnikalar, jamoat transportlari bundan mustasno) tavsiya etildi.

Ichki ishlar vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

a) ikki oy muddatda piyodalar o‘tish yo‘laklarida yo‘l-transport hodisalarining sonini keskin qisqartirish, shuningdek, aholining piyoda yurishi uchun qulayliklar yaratish maqsadida barcha ko‘chalarda o‘rnatilgan svetoforlarning ruxsat beruvchi chiroqlari vaqti oralig‘ini xalqaro standartlar asosida qayta ko‘rib chiqib, piyodalar o‘tish yo‘laklarida, shu jumladan, tartibga solinmagan serqatnov piyodalar va velosipedda harakatlanuvchilar uchun o‘tish yo‘llarida maxsus svetoforlar (tugmachalar orqali boshqariladigan) o‘rnatilishini, piyodalar o‘tish joylarining (zebra) xalqaro tajribadan kelib chiqib tashkil etilishini ta’minlaydi;

b) 2021-yil 1-aprelga qadar mahallalar, qishloqlar, tumanlar, shaharlardagi piyoda va velosipedda yurish uchun mo‘ljallangan “Salomatlik yo‘laklari”ga avtomobil qo‘yishni taqiqlovchi belgilarni, yo‘laklarning boshlanish qismiga avtomobillarning harakat qilishining oldini olish maqsadida maxsus to‘siqlarni o‘rnatadi, bunda to‘siqlar piyoda yurish va velosipedda harakatlanishga xalaqit bermaydigan bo‘lishi inobatga olinadi.

v) piyoda va velosipedda yurish uchun mo‘ljallangan “Salomatlik yo‘laklari”da avtomobil harakatlanishini va u yerga avtomobil qo‘yib ketishning oldini olish nazoratini kuchaytiradi hamda bu ishlarni doimiy ravishda amalga oshiradi;

g) Xalq ta’limi vazirligi, Oliy va o‘rta maxsus ta’lim vazirligi bilan birgalikda o‘quvchilar va talabalar o‘rtasida velosipedda to‘g‘ri harakatlanish, belgilangan yo‘laklardan tashqarida harakatlanmaslik, yo‘l qoidalariga qat’iy rioya qilish bo‘yicha umumta’lim maktablari, professional va oliy ta’lim muassasalarida yo‘l harakati xodimlari ishtirokida dars o‘tish hamda o‘quv qo‘llanmalar va bukletlar tayyorlab o‘quvchi va talabalarga tarqatish bo‘yicha chora-tadbirlar belgilaydi.

2020-yil 1-dekabrdan barcha davlat organlari va tashkilotlari hamda mahalliy davlat hokimiyati organlari:

• birinchi rahbarlar va o‘rinbosarlariga “Shaxsiy namuna” tamoyili asosida tanlangan kunlarda (haftada kamida bir marta) xizmat avtomobillaridan foydalanmagan holda velosipedda yoki piyoda ishga kelishi va ketishi;
• ish joyiga yaqin masofada yashaydigan ishchi xodimlarning velosipedda yoki piyoda ishga kelishi va ketishi tavsiya qilindi.

Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari:

a) 2020-yil 1-dekabrga qadar “Salomatlik yo‘laklari”ni tashkil etishda mahallalar, qishloqlar, tumanlar va shaharlardagi barcha mavjud piyoda va velosipedda yurish yo‘laklarining holatini inventarizatsiya qiladi.

Bunda, “Salomatlik yo‘laklari”ni tashkil etishni birinchi navbatda yaxshi holatda bo‘lgan mavjud piyoda va velosipedda yurish yo‘laklariga tegishli chizmalar chizish, axborot ko‘rsatkichlari va belgilar hamda yoritish tizimlarini o‘rnatish, tekis va to‘siqsiz harakat qilish imkonini yaratish hamda zarur hollarda yangi yo‘laklar tashkil etilishiga e’tibor qaratiladi;

b) 2020-yil 10-dekabrga qadar yillar kesimida har bir mahalla, qishloq, tuman va shaharda “Salomatlik yo‘laklari”ni tashkil etishning tarmoq jadvalini tasdiqlaydi.

Tashkil etiladigan “Salomatlik yo‘laklari” sifati ustidan nazorat olib borish maqsadida (haftada kamida bir marta) tegishli mas’ullar ishtirokida, ushbu yo‘llarda velosipedda yoki piyoda harakatlanish belgilandi;

Qurilish vazirligi 2021-yil 1-yanvarga qadar:

• “Salomatlik yo‘laklari”ni barpo etishda “to‘siqsiz muhit” tashkil etilishi, xususan, yo‘laklarga turli to‘siqlar o‘rnatilishi, qo‘shimcha qurilishlar qurilmasligi va boshqalar bo‘yicha amaldagi shaharsozlik normalariga tegishli qo‘shimcha va o‘zgartirishlar kiritadi;
• Jismoniy tarbiya va sport vazirligi bilan birga Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining qurilish masalalari bo‘yicha o‘rinbosarlari hamda bosh arxitektorlarning “Salomatlik yo‘laklari”ni to‘g‘ri tashkil etish bo‘yicha malakasini oshirish kurslarini tashkil etadi.

Qaror bilan tuman va shaharlarda ko‘chalarni modernizatsiya qilish va yangi yo‘llarni qurishda “Salomatlik yo‘laklari” nazarda tutilmagan taqdirda ushbu loyihalar uchun moliyalashtirish amalga oshirilmasligi hamda davlat komissiyasi tomonidan qabul qilinmasligi belgilab qo‘yildi.

Avvalroq O‘zbekistondagi rahbarlarga haftada kamida bir marta ishga xizmat avtomobilisiz kelib-ketishi tavsiya etilgani hamda 2021-yil iyuldan boshlab vazir va hokimlarning semizlik darajasini onlayn kuzatib borish tizimi yo‘lga qo‘yilishi haqida xabar berilgandi.