Tadbirkorlar faoliyatiga aralashgan Qashqadaryo, Surxondaryo va Xorazm viloyat hokimliklari va hududlardagi IIBlarga nisbatan ish qo‘zg‘atildi. Bu haqda Monopoliyaga qarshi kurashish qo‘mitasi matbuot xizmati xabar berdi.
Ma’lum qilinishicha, qo‘mitaga xo‘jalik yurituvchi subyektlar tomonidan o‘rnatilgan tartibda xarid qilingan paxta chigitini bir viloyatdan (shahardan) boshqa viloyatga (shaharga) olib chiqishda muammolarga duch kelayotganligi yuzasidan noroziliklar bildirgan ko‘plab murojaatlar kelib tushmoqda.
Mazkur murojaatlarga asosan viloyat hokimliklari tomonidan hududlardagi ichki ishlar organlari xodimlariga viloyat hududlaridan paxta chigitini chiqarmaslik to‘g‘risida topshiriq berilganligi va shunga ko‘ra chegara post xizmatlaridan chiqarilmayotganligi bildirilgan.
Qonunchilikda esa birja savdolarida respublikaning barcha hududlaridagi ishlab chiqaruvchi korxonalar tomonidan ushbu chigit mahsulotini sotib olishlari mumkinligi belgilangan bo‘lsa-da, hokimliklar chigitni faqatgina ushbu hududdagi ishlab chiqaruvchilar tomonidan sotib olinishi va ushbu hududdan olib chiqib ketmasdan ishlatishi bo‘yicha ko‘rsatma berilmoqda.
Monopoliyaga qarshi kurashish qo‘mitasi tomonidan barcha viloyatlar hokimliklariga hamda Ichki ishlar vazirligi va vazirlikning viloyat boshqarmalariga bunday harakatlarni sodir etilishiga yo‘l qo‘ymaslik bo‘yicha tegishli choralar ko‘rish yuzasidan murojaat qilingan.
Shuningdek, qo‘mita tomonidan yuqorida tilga olingan viloyatlar hokimliklari hamda Ichki ishlar boshqarmalariga nisbatan tegishli ish qo‘zg‘atilgan.
Ma’lumot uchun, “Tadbirkorlik faoliyati erkinligining kafolatlari to‘g‘risida”gi Qonunining 8-moddasiga muvofiq tadbirkorlik faoliyati subyektlari qonun hujjatlarida taqiqlanmagan har qanday faoliyatni amalga oshirishi hamda o‘z faoliyati yo‘nalishlarini, tovarlar (ishlar, xizmatlar) yetkazib beruvchilarni va o‘z tovarlarining (ishlarining, xizmatlarining) iste’molchilarini mustaqil ravishda tanlashga haqli ekanligi, 34-moddasiga asosan davlat organlari, boshqa tashkilotlar hamda ularning mansabdor shaxslari tadbirkorlik faoliyati subyektlarining amalga oshirayotgan faoliyatiga aralashishga haqli emasligi ko‘rsatilgan.
Davlat organlariga, shuningdek, ularning mansabdor shaxslariga bitimlar tuzish bo‘yicha qarorlar qabul qilish, tadbirkorlik faoliyati subyektlariga ko‘rsatmalar va boshqa farmoyishlar berish taqiqlanadi.
“Raqobat to‘g‘risida”gi qonunining 12-moddasiga asosan davlat boshqaruvi organlari va mahalliy davlat hokimiyati organlarining xo‘jalik yurituvchi subyektlarning iqtisodiy faoliyatiga oqibatda raqobat cheklanishi mumkin bo‘lgan tarzda aralashishi taqiqlanadi, raqobatni rivojlantirishga to‘sqinlik qiluvchi hamda iste’molchilarning huquqlari va qonuniy manfaatlarini kamsituvchi harakatlariga, shu jumladan tegishli bozorni hududiy prinsip bo‘yicha, realizatsiya qilish yoki xaridlar hajmi bo‘yicha, tovarlarning xillari bo‘yicha yoxud tovarlarni sotuvchilar yoki sotib oluvchilar, tovar buyurtmachilari doirasi bo‘yicha bo‘lib olishga yo‘l qo‘yilmaydi.
“Ma’muriy javobgarlik to‘g‘risidagi kodeksi”ning 178-moddasiga asosan raqobat to‘g‘risidagi qonun hujjatlarini, tabiiy monopoliyalar to‘g‘risidagi qonun hujjatlarini va iste’molchilarning huquqlarini himoya qilish to‘g‘risidagi qonun hujjatlarini buzilishi holati bo‘yicha tegishli javobgarlik choralari belgilangan.
Eslatib o‘tamiz, 24-noyabr kuni Shavkat Mirziyoyev tadbirkorlikni rivojlantirish masalalariga bag‘ishlangan yig‘ilishda ish o‘rinlari tashkil etish, tadbirkorlar muammolarini hal qilish va ularni qo‘llab-quvvatlash borasida o‘zibilarchilikka yo‘l qo‘ygan Buxoro, Jondor va Sirdaryo tuman hokimlarini lavozimidan ozod etish masalasini qo‘ygandi.
Izoh (0)