“Xususiy bandlik agentliklarida Koreyaga migrantlarni yuborishga vakolat yo‘q” — Migratsiya agentligi

AOKAda 27-noyabr kuni bo‘lib o‘tgan matbuot anjumanida tashqi mehnat migratsiyasi agentligi boshlig‘i Muhammadzokir Mamatxonov Janubiy Koreyaga fuqarolarni ishga yuborish haqida ma’lumot berdi, deb xabar bermoqda “Kun.uz”.

Qayd etilishicha, hozirda Janubiy Koreyaga migrantlarni yuborish uchun faqat Tashqi mehnat migratsiyasi agentligida imkoniyat bor. Hech bir xususiy bandlik agentligi Koreya Respublikasining migrantlarni qabul qiladigan vakolatli organi bilan shartnomaga ega emas. Agarda xususiy bandlik agentliklari Koreyaning Inson resurslari markazi tashkiloti bilan shartnoma tuzib, ular qo‘ygan talablarni bajarsa, qonunda hech qanday to‘siq yo‘q.

Bir narsa to‘g‘ri qabul qilinishini so‘rardim. Xususiy bandlik agentligi bilan Tashqi mehnat migratsiyasi agentligi bir xil vakolatga ega bo‘lgan tashkilot.

Mana, 20 ta xususiy bandlik agentligimiz qoldi. Ular Koreyadagi migrantlarni qabul qiladigan yagona vakolatli organ bilan shartnoma qila olsa, buni tekshirib, xalqqa e’lon qilishga tayyormiz”,— degan agentlik boshlig‘i.

Avvalroq O‘zbekistonda yaratilayotgan xavfsiz, qonuniy mehnat migratsiya tizimiga 300 milliard so‘m mablag‘ ajratilishi, Xalqaro migratsiya tashkiloti O‘zbekistonda o‘z vakolatxonasini ochishi, shuningdek, O‘zbekistondagi 20 ta xususiy bandlik agentligining litsenziyasi vaqtincha to‘xtatilgani haqida xabar berilgan edi.