“Shunday uy ololmay, o‘lib ketsam kerak, deb o‘ylardim”. Sardoba fojiasi oqibatida boshpanasidan ajralganlarga yangi uylar topshirilmoqda

2020-yilning 1-may kuni Sardoba suv ombori to‘g‘onining 6-piket devoridan suv sizib chiqishni boshlab, toshqin yuzaga kelgan edi. Natijada Sirdaryo viloyatining Sardoba, Mirzaobod va Oqoltin tumanlarida jami 4710 ta xonadon zarar ko‘rgandi.

Sirdaryo viloyati hokimligi axborot xizmatining “Daryo”ga ma’lum qilishicha, bugungi kungacha 1850 ta kottej mukammal ta’mirlanib, o‘z egalariga topshirilgan. Yashash xonadoniga jiddiy zarar yetgan fuqarolar uchun jami 2640 ta xonadonni o‘z ichiga olgan 66 ta ko‘p qavatli turar joy bunyod etildi. Oliy Majlis Qonunchilik palatasining bir guruh deputatlari va Adliya vazirligi vakillaridan iborat ishchi guruh ishtirokida mazkur uy-joylar aholiga adolatli va shaffof tarzda topshirilishi ta’minlanmoqda.

Ayni paytga qadar ishchi guruh tomonidan 2 ming 932 ta oilaning uy-joy olish masalasida qilgan murojaati qabul qilindi va ularning barchasi bir oy davomida o‘rganib chiqildi. Mahalla faollari, qo‘ni-qo‘shnilarning fikr-mulohazalari va munosabatlari inobatga olingan holda qur’a tashlash yo‘li bilan Mirzaobod, Sardoba va Oqoltin tumanlarida jami 1842 ta xonadon kaliti aholiga berildi. Shundan 1753 ta xonadon egalari o‘z uylariga ko‘chib kirdi. “Daryo” muxbiri viloyatning ushbu hududlarida bo‘lib, yangi uy a’zosiga aylangan fuqarolarning ayrimlari bilan suhbatlashdi.

“Tikuv mashinalarim ham suvda oqib ketdi”

Ruxsora Imomova oila a’zolari bilan Sardoba tumanining suv bosgan hududlaridan biri “Yurtdosh” mahallasida istiqomat qilardi. Samarqand viloyatidan kelin bo‘lib tushgan bu ayol may tongi voqeasini shunday xotirlaydi:

“1-may kuni ham odatdagidek juda erta uyg‘ongandik. Turmush o‘rtog‘im Toshkent shahriga ishlagani ketish uchun tayyorgarlik ko‘rib, mashina gaplashgani ko‘chaga chiqib ketgandi. Oradan hech qancha vaqt o‘tmay shum xabar bilan uyga qaytib keldi: suv omboridan suv sizib chiqyaptikan. Bu xabar mahalladoshlar orasida juda tez tarqaldiki, barchani vahima bosgan, odamlar bir-birini ogohlantirardi. Pasport va pullarimizni ham olmay, ustimizdagi kiyimlarimiz bilan ko‘chaga chiqdik va katta yo‘l tomon yugurdik. Jonimiz omon qolganiga shukr, deyman. Muhimi, yaqinlarimning barchasi soppa-sog‘, qolgan narsalar mehnat orqali topiladi”, — dedi u.

Tikuvchilik borasida ko‘p yillik tajribaga ega, o‘nlab shogirdlar yetishtirgan Ruxsora Imomova hozirda “Sardoba Oqsaroy tekstil” MChJda faoliyat yuritmoqda.

“Talafotdan keyin bir necha oy qaynopamning xonadonida istiqomat qildik. Ma’lum vaqt ijara uyda ham kun kechirdik. Eski uyimizga jiddiy zarar yetgani uchun hokimiyatdagilar yaroqsiz deb topishdi va ‘Do‘stlik’ mahallasida qurilgan 1480 ta ko‘p qavatli yangi xonadonlardan birini berishdi. Ko‘chib o‘tganimizga o‘n kundan oshdi. Umr yo‘ldoshim, uch nafar farzandim va qaynonam bilan birga yashayapmiz. Hamma sharoitlar yetarli, isitish va yorug‘lik tizimi ham ancha yaxshi.

Ko‘p yildan beri tikuvchilik bilan shug‘ullanaman. Oldingi xonadonimizda ham buyurtma asosida pardalar, kelin sarpolar tikardim. Mahalladagi qizlarga hunar sirlarini o‘rgatib, ustozlik qilardim. Ming afsuski, uchta tikuv mashinam ham suvda oqib ketdi. Bitta mashinam qizlik davrimdan esdalik bo‘lib qolgandi. Yangi uyga ko‘chganimizdan keyin ushbu korxonaga ishga kirdim. Bir oy davomida bizni qayta o‘qitishdi. Bu yerda qilgan ishimiz va xatti-harakatimizga qarab maosh olishimizni aytishdi. Tikuv mashinasiga yaxshi tushunganim uchun atrofimdagi tikuvchilarga ham bilmaganlarini o‘rgatib turibman. Korxonada, ko‘rib turganingizdek, yuzlab xotin-qizlar ishlaydi. Ish joyim uyimning yonida, yo‘l kiraga pul sarflamayman. Ishxonamiz tushlik beradi”, — dedi mohir tikuvchi.

“Xonalar issiq, yo‘llarimiz asfalt”

Oqoltin va Mirzaobod tumanining ikkita mahallasida yashovchi aholining boshpanasi yaroqsiz holga kelgani uchun ularga 360 ta xonadondan iborat 9 ta ko‘p qavatli uy qurildi. Mirzaobod tumanida joylashgan ushbu mahallaga “Nurli kelajak” nomi berildi.

70 yoshni qarshilagan Yo‘ldoshali ota Qo‘chqorovning oilasiga ham zamonaviy xonadonlardan biri topshirildi. Bir umr qishloq xo‘jaligi sohasida traktor haydab, suvchi bo‘lib ishlagan otaxon bugun juda xursand.

“Yangi xonadonga 14-noyabr kuni ko‘chib keldik. 3 xonali uyda 6 kishi yashaymiz. Oqoltin tumanining ‘Ahillik’ mahallasidagi barcha qo‘ni-qo‘shnilarga ham zamonaviy xonadonlar topshirildi. Hammamiz shu mahallada yana birgamiz. 70 yoshga kirib, hali bunday sharoitlarni ko‘rmagandim. Dalada mol-qo‘yning orqasidan yurgan edik. Xonalar issiq, sovuq va issiq suv bor, yo‘llarimiz asfalt. Shunday uy ololmay, o‘lib ketsam kerak, deb o‘ylardim. Xudoga shukr, minglab odamlar qatori bizga ham nasib qildi. Pasportlarimiz va kadastr hujjatlarigacha yangilab berishdi. Davlatimiz rahbariga katta rahmat”, — dedi Yo‘ldoshali ota Qo‘chqorov.

Zamonaviy shaharcha qiyofasini kasb etgan “Nurli kelajak” mahallasida kunora to‘y marosimi o‘tkazilmoqda: kimdir o‘g‘lini uylagan, yana kimdir qizini turmushga uzatgan. Aziza Ismatova ham uch xonali yangi xonadoniga kelin tushirdi.

“Kelin olish niyatida uyimizni ta’mirdan chiqargan edik. Ammo 1-may kuni suv bosib, katta zarar ko‘rdik. Ushbu voqeadan keyin qattiq tushkunlikka tushib qolgandik. Shukrki, bizga barcha sharoitlarga ega uch xonali uy, 40 million so‘m pul va turli maishiy texnikalar berishdi. Bundan tashqari, eski uyimiz ham o‘zimizga qoldi. O‘g‘limning to‘yini yangi uyimizda o‘tkazdik. Ilohim yoshlar baxtli bo‘lishsin”, — dedi Aziza Ismatova.