O‘zbekiston musulmonlari idorasi raisi, muftiy Usmonxon Alimov xizmat safari bilan Qashqadaryo viloyatida bo‘ldi. Bu haqda O‘zA xabar berdi.
Safar davomida muftiyga Din ishlari bo‘yicha qo‘mita raisi Abdug‘ofur Ahmedov, diniy idora ish boshqaruvchisi Rustam Jamilov, Qashqadaryo viloyati bosh imom-xatibi Rahmatulloh domla Usmonov hamrohlik qilgan.
“Tashrif doirasida o‘tkazilgan viloyat imom-xatiblari bilan muloqotda muftiy hazratlari “hozirgi murakkab davr va sinovli kunlarda diniy soha xodimlari oldida turgan dolzarb vazifalar”ni bayon etgan. “Jumladan, xalqimizning diniy-ma’rifiy ehtiyojlarini ta’minlash va og‘ir kunlarda aholiga ko‘makchi bo‘lish, ish faoliyatini zamon talablari darajasida olib borish zarurligi qayd etildi”, — deyiladi xabarda.
Muloqot davomida tizimda olib borilayotgan ishlar tahlil qilinib, mavjud muammo va kamchiliklar yechimi bo‘yicha takliflar berilgan. Ish faoliyatini yanada takomillashtirish va jaholatga qarshi ma’rifat bilan kurashish masalalariga e’tibor qaratilgan.
“Uchrashuvda O‘zbekistonda olib borilayotgan keng ko‘lamli islohotlarning mazmun-mohiyati, bugungi tinch va osoyishta kunlarning qadriga yetish hamda shukronalik hissi bilan yashash to‘g‘risida keng jamoatchilikka tushuntirish ishlarini olib borish samaradorligini yanada oshirish zarurligi ta’kidlandi”, — deya qo‘shimcha qilingan agentlik xabarida.
Shuningdek, tadbirda “Vaqf” xayriya jamoat fondining yangi rahbari Yahyo Abdurahmonov imom-xatiblarga tanishtirilgan.
Mavzuga doir:
- Chiroqchida 300 yillik tarixga ega masjid soxta hujjatlar bilan yopildi. Aholi buni masjid imomiga nikoh o‘qitmay qo‘yganlik uchun jazo deb hisoblamoqda
- O‘zbekiston musulmonlari idorasi Muhammad (s.a.v) haqidagi karikatura atrofida yuzaga kelgan bahslarga munosabat bildirdi
- O‘zbekiston musulmonlari idorasi: Qur’oni karimni tahqirlashga hech kimning haqqi yo‘q!
Izoh (0)