Zidan, Ibragimovich, Messi Neymar va Ronaldinyo. XXI asrning eng texnikasi yuqori bo‘lgan futbolchilari haqida

Futbol tarixida shunday o‘yinchilar bo‘lgan va borki, ular to‘p bilan harakat qilayotganda bamisoli sehrgarga aylanadi. Himoyachilar uchun ulardan to‘pni olib qo‘yish esa uddalab bo‘lmas topshiriqdek go‘yo. Quyida aynan XXI asrning eng texnikasi yuqori bo‘lgan (“texnar”) futbolchilar haqida fikr yuritamiz.

Tyerri Anri 

Anri top darajadagi futbolchi bo‘lib, “Arsenal”da o‘ynagan kezlari Arsen Venger o‘yinni uning atrofida qurardi. U, asosan, qanotlardan reydlar uyushtirar va raqib himoyachilarini ko‘rdim demasdan dog‘da qoldirardi. Anri muntazam ravishda gol urishdan tashqari, golli uzatmalarni amalga oshirishni ham kanda qilmasdi.

Tyerri Anrining “Barselona” safidagi eng qoyilmaqom gollari (video)

Kaka

Bir qarashda Kaka texnikasi unchalik ham yuqori bo‘lmagan, odatiy yarim himoyachidek ko‘rinishi mumkin. Ammo uning “Milan” va Braziliya terma jamoasidagi o‘yinlariga diqqat bilan nazar solinsa, o‘ta nafis va hayratlanarli harakatlarni ko‘rish mumkin bo‘ladi. Kaka maydon markazida harakat qilishiga qaramay, bir nechta raqiblarni aldab o‘tib, sherigini hal qiluvchi pallaga olib chiqardi, uning uzatmasini golga aylantirmaslik esa shunchaki “ayb” edi. Bundan tashqari braziliyalik muntazam ravishda gollar ham urib turardi.

Kakaning “Milan” safidagi eng sara gollari va driblinglari (video)

Pol Pogba

Jamoaviy o‘yinga bo‘lgan munosabati uchun Pogba juda ko‘p tanqid qilinadi, biroq bir faqt borki, bunga hech kim qarshi chiqa olmaydi. Bu uning to‘pni mahorat bilan o‘zida ushlab tura olishi va raqibidan osonlikcha olib qo‘ya olishidir. To‘g‘ri, u “Manchester Yunayted”da kutilgan o‘yinni namoyish eta olmayapti, biroq Pogbaning muxlislari uning “Yuventus”dagi “sehrgar”liklarini unutganicha yo‘q.

Pogbaning “Manchester Yunayted” safidagi eng sara gollari va driblinglari (video)

Zlatan Ibragimovich

Ibra futboldan tashqari karate bilan ham shug‘ullangani ko‘pchilikka ma’lum bo‘lsa kerak va u maydonda aynan ushbu mahoratlaridan samarali foydalanadi. Hammadan baland sakrashi va boshqalarning boshi-da yetmaydigan to‘pga oyog‘i bilan zarba berishi mumkin. Uning texnikasi haqida esa ortiqcha gapirishning hojati yo‘q. Boisi u oddiy gol urishni bilmaydi. Bunga uning Yevro—2012 saralashida Angliya darvozasiga urgan golini misol keltirish kifoya bo‘loladi.

Ibragimovichning “Milan” safida urgan 70 ta goli bitta videoda

Neymar

Neymar shunchaki fint qilishni va barcha raqiblarini aldab o‘tishni yaxshi ko‘radi, xolos. U futbolni shunday ko‘radi. “Santos” safida faqat mana shu bilan shug‘ullanardi. To‘g‘ri, “Barselona”da u ko‘proq jamoaviy o‘yinchiga aylandi, ammo bu undan to‘pga bo‘lgan muhabbatini tortib ololmadi. PSJga o‘tganidan so‘ng esa u ochiqchasiga raqiblarini masxara qila boshladi, biroq, afsuski, tez-tez jarohat ola boshladi. Chunki, qiziqqon fransuz himoyachilari uning qiliqlariga toqat qila olmayapti.

Neymarning PSJ safidagi eng sara gollari va driblinglari (video)

Faoliyatining eng gullagan vaqtida “So‘yloq”ni to‘xtatish deyarli imkonsiz ish edi. Uning harakatlarida yuqori texnika bilan birga shiddat va tezkorlik ham uyg‘unlashgandi. Alohida qayd etishga arziydigan yana bir jihat, Ronaldo gollarining 60 foizini darvozabonlarni aldab o‘tib urganidir.

Ronaldoning “Real” safidagi shedevr gollari (video)

Texnika bobida ispanlar bilan ehtiyotkorroq bo‘lgan ma’qul, boisi texnikasi yo‘q ispaniyalik futbolchini topish juda mushkul vazifa. Biroq ular orasida Inyesta alohida e’tirof etishga loyiqdir. Uchrashuvlar vaqtida u bir qator futbolchilar qurshovida qolib ketar, ammo undan to‘pni olib qo‘yish baxti kamdan kam omadlilarga nasib etardi. Shunday ekan, uning ro‘yxatdan o‘rin olmasligi maestroga nisbatan adolatsizlik bo‘lardi.

Lionel Messi

Messi 35 yoshga yaqinlashayotgan bo‘lsa-da, hamon to‘p bilan sehrlarni amalga oshirishda davom etmoqda. Ha, to‘g‘ri, tezlik biroz pasaygan. Ammo “Liverpul” himoyachisi Trent Aleksander-Arnold aytganidek, Messi himoyachilarni xuddi manekenlarni aldagandek ortda qoldiradi. Tan olish lozim, tezkor dribling va to‘pga egalik qilish borasida unga teng keladigani yo‘q. Agar afsonaviy Maradona Angliya terma jamoasiga qarshi o‘yinda 6 ta inglizni aldab o‘tib, bo‘sh darvozani ishg‘ol qilgani bilan maqtansa, Messi uchun bu odatiy hol. Shunga qaramay, dunyo futbolida Messidan-da iqtidorli va nafis harakat egalari bor...

Messining uzoq masofalardan urgan shedevr gollari (video)

Zidan tom ma’noda afsonaviy futbolchi hisoblanadi. Uning o‘yinidagi rang baranglik va aniqlik kishini hayratga solardi. Zidan har doim aql bilan o‘ynagan. To‘pni qanday qabul qilish, uni qayerga uzatish, qanday driblingni amalga oshirish va qaysi burchakka zarba berish — Zidanning harakatlarini ko‘rib, u bularni o‘yindan bir necha kun oldin yodlab, keyin chiqqan degan taassurot uyg‘onardi.

Zidanning “Real” safida urgan top-20 goli (video)

Ronnining ushbu ro‘yxatda birinchi bo‘lishiga hech kim e’tiroz bildirmasa kerak. Shubhasiz, Ronaldinyo futbol sehrgari edi. Aytishlaricha, uchta narsani muntazam kuzatish mumkin ekan: suvning oqishini, olovning yonishi va Ronaldinyoning o‘yinini. Agar Zidan aql va aniq o‘ynagan bo‘lsa, Ronaldinyo maydonda shunchaki ko‘ngli tusagan narsani qilardi, o‘ylab ham o‘tirmasdi. Uning uchun futbol kasb emasdi, Ronaldinyo u bilan yashardi. Inson uning driblingi va elastik harakatlarini kuzatar ekan, bir lahzaga bo‘lsa-da hamma narsani unutadi, rohatlanadi. Jahon futboli tarixida undan “texnar”roq futbolchi bo‘lmasa kerak degan fikrga, katta ehtimol bilan hech kim qarshi chiqmaydi.

Ronaldinyoning “Barselona” safidagi barcha gollari (video)

Krishtianu Ronalduning “Manchester Yunayted”dagi faoliyati

Balki, hozir Ronaldu “texnar” futbolchi hisoblanmas, ammo tan olish lozimki, Krishtianu “Manchester Yunayted”da haqiqatan ham texnik va chiroyli futbol namoyish etardi. Aynan tezkor dribling va hech kimda yo‘q aldamchi harakatlar uni Ronaldu qilgan. “Yunayted” davridagi Ronaldu texnika borasida Neymardan qolishmasdi, balki undan ham yaxshiroq bo‘lgandir. Bu endi did masalasi... Bugungi kunda ham uning texnikasi hech qayerga yo‘qolib qolgani yo‘q, shunchaki u hujum chizig‘ini tanladi va ko‘proq gol urishni ma’qul ko‘rdi. Bor gap shu.