Зидан, Ибрагимович, Месси Неймар ва Роналдиньо. XXI асрнинг энг техникаси юқори бўлган футболчилари ҳақида

Футбол тарихида шундай ўйинчилар бўлган ва борки, улар тўп билан ҳаракат қилаётганда бамисоли сеҳргарга айланади. Ҳимоячилар учун улардан тўпни олиб қўйиш эса уддалаб бўлмас топшириқдек гўё. Қуйида айнан XXI асрнинг энг техникаси юқори бўлган («технар») футболчилар ҳақида фикр юритамиз.

Тьерри Анри 

Анри топ даражадаги футболчи бўлиб, «Арсенал»да ўйнаган кезлари Арсен Венгер ўйинни унинг атрофида қурарди. У, асосан, қанотлардан рейдлар уюштирар ва рақиб ҳимоячиларини кўрдим демасдан доғда қолдирарди. Анри мунтазам равишда гол уришдан ташқари, голли узатмаларни амалга оширишни ҳам канда қилмасди.

Тьерри Анрининг «Барселона» сафидаги энг қойилмақом голлари (видео)

Кака

Бир қарашда Кака техникаси унчалик ҳам юқори бўлмаган, одатий ярим ҳимоячидек кўриниши мумкин. Аммо унинг «Милан» ва Бразилия терма жамоасидаги ўйинларига диққат билан назар солинса, ўта нафис ва ҳайратланарли ҳаракатларни кўриш мумкин бўлади. Кака майдон марказида ҳаракат қилишига қарамай, бир нечта рақибларни алдаб ўтиб, шеригини ҳал қилувчи паллага олиб чиқарди, унинг узатмасини голга айлантирмаслик эса шунчаки «айб» эди. Бундан ташқари бразилиялик мунтазам равишда голлар ҳам уриб турарди.

Каканинг «Милан» сафидаги энг сара голлари ва дриблинглари (видео)

Пол Погба

Жамоавий ўйинга бўлган муносабати учун Погба жуда кўп танқид қилинади, бироқ бир фақт борки, бунга ҳеч ким қарши чиқа олмайди. Бу унинг тўпни маҳорат билан ўзида ушлаб тура олиши ва рақибидан осонликча олиб қўя олишидир. Тўғри, у «Манчестер Юнайтед»да кутилган ўйинни намойиш эта олмаяпти, бироқ Погбанинг мухлислари унинг «Ювентус»даги «сеҳргар»ликларини унутганича йўқ.

Погбанинг «Манчестер Юнайтед» сафидаги энг сара голлари ва дриблинглари (видео)

Златан Ибрагимович

Ибра футболдан ташқари каратэ билан ҳам шуғуллангани кўпчиликка маълум бўлса керак ва у майдонда айнан ушбу маҳоратларидан самарали фойдаланади. Ҳаммадан баланд сакраши ва бошқаларнинг боши-да етмайдиган тўпга оёғи билан зарба бериши мумкин. Унинг техникаси ҳақида эса ортиқча гапиришнинг ҳожати йўқ. Боиси у оддий гол уришни билмайди. Бунга унинг Евро—2012 саралашида Англия дарвозасига урган голини мисол келтириш кифоя бўлолади.

Ибрагимовичнинг «Милан» сафида урган 70 та голи битта видеода

Неймар

Неймар шунчаки финт қилишни ва барча рақибларини алдаб ўтишни яхши кўради, холос. У футболни шундай кўради. «Сантос» сафида фақат мана шу билан шуғулланарди. Тўғри, «Барселона»да у кўпроқ жамоавий ўйинчига айланди, аммо бу ундан тўпга бўлган муҳаббатини тортиб ололмади. ПСЖга ўтганидан сўнг эса у очиқчасига рақибларини масхара қила бошлади, бироқ, афсуски, тез-тез жароҳат ола бошлади. Чунки, қизиққон француз ҳимоячилари унинг қилиқларига тоқат қила олмаяпти.

Неймарнинг ПСЖ сафидаги энг сара голлари ва дриблинглари (видео)

Фаолиятининг энг гуллаган вақтида «Сўйлоқ»ни тўхтатиш деярли имконсиз иш эди. Унинг ҳаракатларида юқори техника билан бирга шиддат ва тезкорлик ҳам уйғунлашганди. Алоҳида қайд этишга арзийдиган яна бир жиҳат, Роналдо голларининг 60 фоизини дарвозабонларни алдаб ўтиб урганидир.

Роналдонинг «Реал» сафидаги шедевр голлари (видео)

Техника бобида испанлар билан эҳтиёткорроқ бўлган маъқул, боиси техникаси йўқ испаниялик футболчини топиш жуда мушкул вазифа. Бироқ улар орасида Иньеста алоҳида эътироф этишга лойиқдир. Учрашувлар вақтида у бир қатор футболчилар қуршовида қолиб кетар, аммо ундан тўпни олиб қўйиш бахти камдан кам омадлиларга насиб этарди. Шундай экан, унинг рўйхатдан ўрин олмаслиги маэстрога нисбатан адолатсизлик бўларди.

Лионель Месси

Месси 35 ёшга яқинлашаётган бўлса-да, ҳамон тўп билан сеҳрларни амалга оширишда давом этмоқда. Ҳа, тўғри, тезлик бироз пасайган. Аммо «Ливерпуль» ҳимоячиси Трент Александер-Арнольд айтганидек, Месси ҳимоячиларни худди манекенларни алдагандек ортда қолдиради. Тан олиш лозим, тезкор дриблинг ва тўпга эгалик қилиш борасида унга тенг келадигани йўқ. Агар афсонавий Марадона Англия терма жамоасига қарши ўйинда 6 та инглизни алдаб ўтиб, бўш дарвозани ишғол қилгани билан мақтанса, Месси учун бу одатий ҳол. Шунга қарамай, дунё футболида Мессидан-да иқтидорли ва нафис ҳаракат эгалари бор...

Мессининг узоқ масофалардан урган шедевр голлари (видео)

Зидан том маънода афсонавий футболчи ҳисобланади. Унинг ўйинидаги ранг баранглик ва аниқлик кишини ҳайратга соларди. Зидан ҳар доим ақл билан ўйнаган. Тўпни қандай қабул қилиш, уни қаерга узатиш, қандай дриблингни амалга ошириш ва қайси бурчакка зарба бериш — Зиданнинг ҳаракатларини кўриб, у буларни ўйиндан бир неча кун олдин ёдлаб, кейин чиққан деган таассурот уйғонарди.

Зиданнинг «Реал» сафида урган топ-20 голи (видео)

Роннининг ушбу рўйхатда биринчи бўлишига ҳеч ким эътироз билдирмаса керак. Шубҳасиз, Роналдиньо футбол сеҳргари эди. Айтишларича, учта нарсани мунтазам кузатиш мумкин экан: сувнинг оқишини, оловнинг ёниши ва Роналдиньонинг ўйинини. Агар Зидан ақл ва аниқ ўйнаган бўлса, Роналдиньо майдонда шунчаки кўнгли тусаган нарсани қиларди, ўйлаб ҳам ўтирмасди. Унинг учун футбол касб эмасди, Роналдиньо у билан яшарди. Инсон унинг дриблинги ва эластик ҳаракатларини кузатар экан, бир лаҳзага бўлса-да ҳамма нарсани унутади, роҳатланади. Жаҳон футболи тарихида ундан «технар»роқ футболчи бўлмаса керак деган фикрга, катта эҳтимол билан ҳеч ким қарши чиқмайди.

Роналдиньонинг «Барселона» сафидаги барча голлари (видео)

Криштиану Роналдунинг «Манчестер Юнайтед»даги фаолияти

Балки, ҳозир Роналду «технар» футболчи ҳисобланмас, аммо тан олиш лозимки, Криштиану «Манчестер Юнайтед»да ҳақиқатан ҳам техник ва чиройли футбол намойиш этарди. Айнан тезкор дриблинг ва ҳеч кимда йўқ алдамчи ҳаракатлар уни Роналду қилган. «Юнайтед» давридаги Роналду техника борасида Неймардан қолишмасди, балки ундан ҳам яхшироқ бўлгандир. Бу энди дид масаласи... Бугунги кунда ҳам унинг техникаси ҳеч қаерга йўқолиб қолгани йўқ, шунчаки у ҳужум чизиғини танлади ва кўпроқ гол уришни маъқул кўрди. Бор гап шу.