O‘zbekiston futbol assotsiatsiyasining futbol faoliyatini nazorat qilish maxsus inspeksiyasi Superliga va Pro-Liga uchrashuvlarida korrupsion holatlarni aniqladi. Bu haqida tashkilot rasmiy saytida xabar berildi.
Qayd etilishicha, bir qator futbol o‘yinlarida uchrashuvga yoki uning natijasiga ta’sir o‘tkazish maqsadida kelishuvlarda qatnashgan bir qator futbol hakamlari aniqlangan.
O‘FA inspeksiyasi tomonidan mazkur holatga aloqadorlikda gumon qilingan 10 nafardan ortiq futbol hakamlari, professional futbol klublarining murabbiy va rasmiy shaxslari bo‘yicha ma’lumotlar, tegishli futbol uchrashuvlari qaydnomalari, inspektorlarning futbol uchrashuvlari bo‘yicha hisobotlari, hakamlarning futbol faoliyatini himoya qilish to‘g‘risidagi deklaratsiyalari, tegishli futbol uchrashuvlaridagi shubhali epizodlar aks etilgan videomateriallar O‘FA Etika qo‘mitasiga ko‘rib chiqish uchun taqdim etilgan.
“Taqdim etilgan ma’lumotlar bo‘yicha 2020-yilning 17 va 25-noyabr kunlari O‘FA Etika qo‘mitasining yig‘ilishlari bo‘lib o‘tgan va unda aybdorlarga nisbatan tegishli tartibda jazo choralari qo‘llanilgan.
Ularga ko‘ra:
- FIFA, OFK hakami Jasur Muxtorov O‘FA intizom kodeksining 5.44 bandiga asosan bir qator futbol o‘yinlarida uchrashuvga yoki uning natijasiga ta’sir o‘tkazish maqsadida kelishuvlarda qatnashgani uchun 5 yil muddatga futbol bilan bog‘liq har qanday faoliyatdan chetlatildi hamda 90 million so‘m jarimaga tortildi;
- O‘FA hakami Temur To‘xtasinov O‘FA intizom kodeksining 5.44 bandiga asosan bir qator futbol o‘yinlarida uchrashuvga yoki uning natijasiga ta’sir o‘tkazish maqsadida kelishuvlarda qatnashgani uchun 2021-yilgi futbol mavsumida hakamlik qilishdan chetlatildi va 10 million so‘m jarimaga tortildi;
- O‘FA hakami Asker Najafaliyev hakamlarning futbol faoliyatini himoya qilish to‘g‘risidagi deklaratsiyasiga asosan O‘FA futbol faoliyatini nazorat qilish maxsus inspeksiyasi bilan hamkorlik qilganligi va OFK Hakamlar akademiyasida tahsil olayotganligi, tahsil jarayonida eng yaxshi ko‘rsatkichlarni qo‘rsatayotganligini inobatga olib, biroq O‘FA intizom kodeksining 5.42 bandiga asosan PFL musobaqalarini o‘tkazish bilan bog‘liq real faktlarni buzib ko‘rsatishga uringanligi uchun 2020-yil futbol mavsumi oxirigacha hakamlik qilishdan chetlatildi va 70 million so‘m jarimaga tortildi.
Mazkur qaror O‘FA tomonidan rasmiy tarzda e’lon qilingan kundan boshlab kuchga kiradi”, — deyiladi O‘FA bayonotida.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)