Fomalhaut tadqiqot kompaniyasi Nikkei Asia nashri bilan hamkorlikda yangi iPhone jamlanmalarining tannarxini 406 dollarga baholadi. Shu bilan birga, smartfon do‘konlarda 999 dollardan — 2,5 barobar qimmat narxda sotilmoqda, deb yozadi Hi-Tech.Mail.ru.
Gap barcha ehtiyot qismlarining alohida olingan holdagi narxi haqida ketmoqda — displey, korpus, kameralar, chiplar va hokazo. Tannarxda qurilmani yaratish, yig‘ish, logistika, xodimlarga maosh, bino ijarasi va do‘konlarda ustiga qo‘yilgan narx hisobga olinmaydi.
Shu sababli Apple aslida har bir iPhone’dan qancha daromad qilishini aniq aytish qiyin. Shu bilan birga, kompaniya smartfonlardan daromad ko‘rayotgan yetakchi kompaniya hisoblanadi — u qolgan ishlab chiqaruvchilardan kam sotadi, biroq har biridan o‘rtacha ko‘proq pul ishlaydi.
E’tiborli jihati, iPhone 12 Pro’ning 21,9 foizi Amerikada, 26,8 foizi Janubiy Koreyada, qolgan ulushi Yevropa, Yaponiya, Tayvan va Xitoyda ishlab chiqarilgan ehtiyot qismlardan iborat. Janubiy Koreyaning asosiy ulushi Samsung tomonidan ishlab chiqariladigan OLED-displeylarga to‘liq o‘tilganidan ortgan. 2019-yilning eng mashhur smartfoni — iPhone 11 IPS-matrisali hisoblanadi.
2020-yilda koronavirus sabab Apple sentabr oyida o‘tkaziladigan an’anaviy taqdimotini kechiktirishga majbur bo‘ldi — iPhone 12 va 12 Pro oktabrda, iPhone 12 mini va 12 Pro Max noyabr boshida taqdim etildi.
Izoh (0)