Gartner tahliliy agentligi smartfonlar bozoriga oid navbatdagi hisoboti bilan bo‘lishdi. Ma’lum bo‘lishicha, 2020-yilning uchinchi choragida butun dunyo bo‘ylab 366 million smartfon sotilgan — bu o‘tgan yilning mos davriga nisbatan 5,7 foizga kam. Bu kabi pasayish sezilarli darajada bo‘lsa ham, biroq yilning birinchi yarim yilligida kuzatilgan 20 foizli pasayish ko‘rsatkichidan kamroq, deb yozadi IXBT.
Savdolar bo‘yicha yetakchilik hamon Samsung kompaniyasida — 80,82 million dona qurilma sotilgan bo‘lib, u bozorning 22 foizini tashkil etgan. Umuman olganda, Top-5 ro‘yxatga kiruvchilar orasida faqat Samsung va Xiaomi savdolar hajmini oshira olgan — mos ravishda 2,2 foiz va 34,9 foizga. Ikkinchi o‘rinni 51,83 million dona smartfon sotib Huawei egallagan — uning bozordagi ulushi 14,4 foizga teng. Xiaomi 44,41 million dona smartfon bilan 12,1 foiz ulushga ega bo‘lgan.
Apple esa to‘rtinchi o‘rinni egallagan. Kompaniya iyuldan sentabrga qadar 40,6 million dona smartfon sotgan — bozordagi ulushi 11,1 foiz. E’tiborli jihati, Oppo kompaniyasi Apple’ning natijasiga yaqinlashib qolgan: uchinchi chorakda kompaniya 29,89 million dona smartfon sotgan (8,2 foiz).
Avvalroq Apple kompaniyasi Xitoyda iPhone savdolari tushib ketganidan so‘ng 83 milliard dollarga arzonlashgani to‘g‘risida xabar berilgandi.
Izoh (0)