Samarqand viloyatining Toyloq tumanida katta tezlikda harakatlanib kelgan Nexia haydovchisi aylanma yo‘lga kelganda rul boshqaruvini yo‘qotgan va YTH sodir bo‘lgan. Bu haqda “Daryo”ga viloyat IIB axborot xizmati ma’lum qildi.
Ma’lum bo‘lishicha, voqea 2020-yilning 14-noyabr kuni soat tongi 05:30 da Toyloq tumanidan o‘tuvchi A-377 xalqaro ahamiyatga ega Samarqand—Ayniy avtomobil yo‘lining to‘qqizinchi kilometrida sodir bo‘lgan.
Samarqand shahridan Urgutga qarab harakatlanib kelayotgan oq rangli Nexia haydovchisi Toyloq tumanidagi yo‘lning aylanma harakatlanuvchi qismiga kelganda yuqori tezlikda bo‘lgani bois rul boshqaruvini yo‘qotgan. Oqibatida avtomobil beton to‘siqqa urilib, yo‘l-transport hodisasi sodir bo‘lgan. Natijada haydovchi va yo‘lovchi olgan tan jarohatlari tufayli tuman tibbiyot birlashmasiga yotqizilgan. Shifokorlar tomonidan ko‘rsatilgan muolajalarga qaramasdan, avtomashina haydovchisi vafot etgan.
Izoh (0)