General Motors avtomobil korporatsiyasi batareyalarining yonib ketish xavfi sabab 68 667 ta Chevrolet Bolt EV elektromobillarini chaqirib oladi, deb xabar beradi “Korrespondent.net”.
Kompaniyadagilarning ta’kidlashicha, gap 2017—2019-yillar oralig‘idagi modellar haqida ketmoqda, ularning aksariyati (50 925) AQSh hududida sotilgan.
“General Motors va Chevrolet Janubiy Koreyadagi LG Chem zavodida ishlab chiqarilgan, yuqori voltli akkumulyatorlarga ega Chevrolet Bolt’larni o‘z xohishi bilan chaqirib olishga qaror qildi, chunki u to‘liq yoki deyarli to‘liq quvvatlantirilganida yonib ketishi mumkin”, — deyiladi xabarda.
Bugungi kunda akkumulyatorlarning yonib ketishi bo‘yicha beshta holat tasdiqlangan bo‘lib, ularning uchtasi oktabr oyida aniqlangan.
Ko‘ngilsiz hodisalar natijasida ikki kishi jarohat olgan. General Motors hozirda akkumulyatorlar nima sababdan yonayotganini aniqlamagan.
Eslatib o‘tamiz, 2015-yilda General Motors moy oqishi muammosi sabab 1,4 million, 2016-yilda tormoz tepkisidagi muammolar tufayli AQSh va Kanada bo‘ylab 473 mingta pikap (yengil yuk ortish avtomashinasi) va yo‘ltanlamaslarni, 2017-yilda ruldagi muammolar sabab jahon bo‘yicha 800 ming avtomobilini chaqirib olgan edi.
Izoh (0)