Farg‘ona viloyati Marg‘ilon shahrida 22 yoshli haydovchi Spark avtomobilini tezligini oshirishi natijasida boshqaruvni yo‘qotib yo‘l-transport hodisasi sodir etdi, deya xabar bermoqda YHXBB.
Ma’lum qilinishicha, 2020-yilning 6-noyabr kuni soat 23:15 larda Farg‘ona viloyati IIB YHXB navbatchilik qismiga xabar kelib tushadi. Qayd etilishicha shu kuni 22:30 larda Farg‘ona viloyati Marg‘ilon shahar Alisher Navoiy ko‘chasi 290-uy oldida Spark rusumli avtomashina katta tezlikda harakatlanib, haydovchi boshqaruvni yo‘qotishi natijasida yo‘l chetidagi chinor daraxtiga urilgan.
Oqibatda olgan tan jarohatlari sababli 22 yoshli haydovchi va 17 yoshli yo‘lovchi voqea joyida vafot etgan.
Hodisa yuzasidan Marg‘ilon IIB tomonidan Jinoyat kodeksining 266-moddasi 3-qismi “a” bandi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Avvalroq Namanganda ikki yuk mashinasi ishtirokidagi YTH oqibatida yo‘lovchi vafot etgani, Yunusobodda mast haydovchining boshqaruvidagi Lacetti beton to‘siqqa urilib, tiklab bo‘lmas holatga kelgani hamda Navoiyda mast haydovchi boshqaruvidagi Nexia piyodani urib ketgani haqida xabar berilgan edi.
Izoh (0)