Chernogoriyada koronavirus tarqalishining oldini olish uchun 15-noyabr kunidan boshlab komendantlik soat joriy qilinadi. Fuqarolarning soat 21:00 dan 05:00 gacha uydan chiqishi taqiqlanadi. Bu haqda Chernogoriyaning Yuqumli kasalliklar bo‘yicha milliy kengashi ma’lum qildi, deb yozmoqda Meduza.
Xabar berilishicha, komendantlik soati 1-dekabrga qadar amalda bo‘ladi va undan keyin uzaytirilishi mumkin.
Shuningdek, 15-noyabrdan boshlab mamlakatdagi do‘konlar va restoranlar faqat soat 20:00 gacha ishlaydi. Dam olish kunlari bir shahardan boshqasiga sayohat qilish taqiqlanadi. Bundan tashqari, to‘rt nafardan ortiq odamning yig‘ilishiga taqiq joriy etiladi.
Chernogoriyada COVID-19 tarqalishi bilan bog‘liq vaziyat may oyida epidemiya sababli amaldagi barcha cheklovlar bekor qilingandan so‘ng, iyun oyining o‘rtalariga kelib yomonlasha boshlagan.
Sentabr oyida Chernogoriya 100 ming aholiga to‘g‘ri keladigan COVID-19 bilan kasallanish holatlari soni bo‘yicha Bolqonda birinchi o‘rinni egalladi. 13-noyabrda kun davomida Chernogoriyada 601 kishida koronavirus infeksiyasi qayd etildi. Pandemiya davrida mamlakatda 26,1 ming kishi koronavirus bilan kasallangan, 377 kishi kasallik sababli vafot etgan.
Avvalroq Gretsiyada umummilliy karantin tartibi e’lon qilingani, Italiyaning barcha hududida koronavirus sababli komendantlik soati joriy etilgani, Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlangani, Latviyada koronavirus sabab favqulodda holat e’lon qilingani to‘g‘risida xabar berilgandi. Ruminiyada 9-noyabrdan bir oyga komendantlik soati va majburiy niqob taqish rejimi joriy etildi, Gruziyaning yirik shaharlarida ham koronavirus tufayli komendantlik soati joriy qilindi.
Izoh (0)