Zelenskiy yaxshi xabarlarni ukrainaliklarga o‘zi yetkazib turishga qaror qildi

Ukraina prezidenti Vladimir Zelenskiy ukrainaliklarga yangiliklarni o‘zi yetkazib turishini aytdi, deb yozadi “RBK” uning Telegram kanaliga tayanib.

Zelenskiyning aytishicha, Ukraina telekanallarida “yaxshi yangiliklar yo‘q”.

“Shuning uchun sizlarga ish kunidagi voqealar haqida o‘zim xabar berib turishga qaror qildim”, — dedi Zelenskiy. Uning qayd etishicha, buni “vositachilarsiz, manipulyatsiyalarsiz, asosiysi, yolg‘onsiz” amalga oshiradi.

Davlat rahbari maslahatchisi Mixail Podolyakning ma’lum qilishicha, Zelenskiy videoblogni ishga tushirib, uni muntazam ravishda yuritib borishni rejalashtirmoqda.

Ayni paytda Ukraina rahbari kasalxonada davolanmoqda: unda koronavirus aniqlangan edi. Dastlab prezident o‘zini o‘zi yakkaladi, ammo bir necha kundan keyin kasalxonaga yotqizildi.

Eslatib o‘tamiz, 9-noyabr kuni Ukraina prezidenti devoni Vladimir Zelenskiyda koronavirus aniqlanganini ma’lum qildi. Shu kuni prezident devoni rahbari Andrey Yermak ham koronavirusga chalingani ma’lum bo‘ldi. Zelenskiy Twitter’da o‘zini yaxshi his qilayotgani, ishlashda davom etayotgani va kasallikni yengib o‘tishiga ishonchi komil ekanini ta’kidladi.

Jons Hopkins universiteti ma’lumotlariga ko‘ra, Ukrainada koronavirusga chalinish bilan bog‘liq 504 423 ta holat qayd etilgan. Bemorlarning 237 399 nafari sog‘aygan, 9 422 nafari vafot etgan.

Avvalroq Ukrainada favqulodda holat rejimi uzaytirilgani xabar qilingan edi.