Черногорияда коронавирус тарқалишининг олдини олиш учун 15 ноябрь кунидан бошлаб комендантлик соат жорий қилинади. Фуқароларнинг соат 21:00 дан 05:00 гача уйдан чиқиши тақиқланади. Бу ҳақда Черногориянинг Юқумли касалликлар бўйича миллий кенгаши маълум қилди, деб ёзмоқда Meduza.
Хабар берилишича, комендантлик соати 1 декабрга қадар амалда бўлади ва ундан кейин узайтирилиши мумкин.
Шунингдек, 15 ноябрдан бошлаб мамлакатдаги дўконлар ва ресторанлар фақат соат 20:00 гача ишлайди. Дам олиш кунлари бир шаҳардан бошқасига саёҳат қилиш тақиқланади. Бундан ташқари, тўрт нафардан ортиқ одамнинг йиғилишига тақиқ жорий этилади.
Черногорияда COVID-19 тарқалиши билан боғлиқ вазият май ойида эпидемия сабабли амалдаги барча чекловлар бекор қилингандан сўнг, июнь ойининг ўрталарига келиб ёмонлаша бошлаган.
Сентябрь ойида Черногория 100 минг аҳолига тўғри келадиган COVID-19 билан касалланиш ҳолатлари сони бўйича Болқонда биринчи ўринни эгаллади. 13 ноябрда кун давомида Черногорияда 601 кишида коронавирус инфекцияси қайд этилди. Пандемия даврида мамлакатда 26,1 минг киши коронавирус билан касалланган, 377 киши касаллик сабабли вафот этган.
Аввалроқ Грецияда умуммиллий карантин тартиби эълон қилингани, Италиянинг барча ҳудудида коронавирус сабабли комендантлик соати жорий этилгани, Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқлангани, Латвияда коронавирус сабаб фавқулодда ҳолат эълон қилингани тўғрисида хабар берилганди. Руминияда 9 ноябрдан бир ойга комендантлик соати ва мажбурий ниқоб тақиш режими жорий этилди, Грузиянинг йирик шаҳарларида ҳам коронавирус туфайли комендантлик соати жорий қилинди.
Изоҳ (0)