O‘zbekiston terma jamoasi 12-noyabr, payshanba kuni Suriyaga qarshi o‘rtoqlik uchrashuvi o‘tkazdi.
Uchrashuv har ikki tomonning faolligida boshlandi, biroq 10-daqiqadayoq maydondagi vaziyat o‘zgardi. Darvozabon bilan birga bir vaziyatga chiqib ketayotgan o‘yinchini to‘xtatib qolgan Hojiakbar Alijonov hakam tomonidan to‘g‘ridan to‘g‘ri qizil kartochka loyiq ko‘rildi. Tanaffusga qadar Vadim Abramov shogirdlari Suriya bilan tengma-teng o‘yin namoyish qildi.
Ikkinchi bo‘lim debyutida suriyaliklar hisobni ochishga muvaffaq bo‘ldi. Jaloliddin Masharipovning noaniq uzatmasidan keyin suriyaliklar qarshi hujumga o‘tib ketdi: Mahmud al-Movas esa qulay imkoniyatni ko‘kka sovurmadi.
52-daqiqada Yusuf al-Hamvi qo‘pol harakati uchun maydondan chetlatildi. Oradan ko‘p o‘tmay suriyaliklar penalti ishlab oldi, biroq al-Movasning zarbasini Abduvohid Ne’matov qaytarishga erishdi.
Shundan keyin o‘zbekistonliklar faollikni oshirdi. Biroq suriyaliklar chuqur himoya va epizodlarda vaqtni cho‘zish orqali tempni tushirishga o‘ynadi. So‘nggi daqiqalarda “oq bo‘rilar” bir qator golga tortadigan vaziyatlarga ega bo‘ldi. Biroq hisob o‘yin yakuniga qadar o‘zgarmadi.
O‘rtoqlik uchrashuvi
12-noyabr, payshanba
Suriya — O‘zbekiston 1:0
Gol: 1:0 – 47 al-Movas.Suriya: Ibrohim Alma, Yussuf al-Hamvi, Muayad Alaja, Faris al-Arnaut, Amar al-Midoni, Kamel Hmeisheh, Aias Osman, Mahmud al-Movas, Muhammad Osman, Maher Daabul, Alaa Edin Dali.
O‘zbekiston: Abduvohid Ne’matov, Islom Qobilov, Hojiakbar Alijonov, Azizjon G‘aniyev, Oybek Bozorov (Dostonbek Hamdamov, 61), Jaloliddin Masharipov (Hojimat Erkinov, 61), Lutfulla To‘rayev (Sanjar Qodirqulov, 82), Bobur Abduxoliqov (Temurxo‘ja Abduxoliqov, 76), Igor Golban (Murod Xolmuhammedov, 68), Jamshid Iskandarov (Abror Ismoilov, 68), Ibrohimhalil Yo‘ldoshev.
Ogohlantirishlar: To‘rayev (11), Qobilov (65), Xolmuhammedov (79).
Chetlatishlar: Alijonov (10), Al-Hamvi (52).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)