Professional futbol Ligasi (PFL) Coca-Cola Superliganing oktabr oyidagi eng yaxshilarini aniqlash uchun o‘tkazilgan so‘rovnoma natijalarini e’lon qildi.
Unga ko‘ra, “Paxtakor” bosh murabbiyi Shota Arveladze oktabr oyining eng yaxshi murabbiyi deb topildi. Gruziyalik mutaxassis qo‘l ostida jamoa o‘tgan oydagi besh o‘yinning barchasida g‘alaba qozondi.
Ushbu nom uchun shuningdek, “Nasaf” ustozi Ro‘ziqul Berdiyev (3 g‘alaba, 1 durang) va “So‘g‘diyona” bosh murabbiyi Ulug‘bek Baqoyev (3 g‘alaba, 2 durang, 1 mag‘lubiyat) da’vogarlik qilgandi.
Oyning eng yaxshi futbolchisi maqomiga “Nasaf” hujumchisi Bobur Abduxoliqov loyiq ko‘rildi. Qarshiliklar forvardi oktabr oyida to‘rtta gol urishga muvaffaq bo‘lgandi.
Bobur bu borada “So‘g‘diyona” yarim himoyachisi Jasur Hasanov (2 gol va 2 assist) va “Paxtakor” forvardi Doston Hamdamovni (4 gol va 2 assist) ortda qoldirdi.
“Nasaf” legioneri Marko Stanoyevichning OKMK darvozasiga jarimadan kiritgan to‘pi esa oyning eng chiroyli goli sifatida e’tirof etildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)