Oila, uy va mashinalar. Muhammad Saloh qanday hayot kechiradi?

“Liverpul” va Misr terma jamoasi yetakchisi Muhammad Saloh mana uch yildirki (2017-yilda “Liverpul”ga o‘tganidan beri), yuqori darajada o‘yin ko‘rsatmoqda. Uning muxlislari safi esa tobora kengayib bormoqda. Tabiiyki, ularni Salohning maydondagi harakatlaridan tashqari, uning shaxsiy hayoti, mashinalari, uylari va umuman qanday hayot kechirishi qiziqtiradi. Garchi Muhammad shaxsiy hayotini ommaga namoyish etishni unchalik xushlamasa ham, quyida aynan mazkur savollarga imkon qadar javob berishga harakat qilamiz.

Saloh qayerda yashaydi?

Futbolchi Liverpul atrofidagi shaxsiy uyida yashaydi. Ushbu uy unga klub tomonidan taqdim etilgan. U atigi 2 qavat bo‘lib, ixcham va ko‘p joyni egallamaydi. Hududda katta sport zali va ulkan suzish havzalari yo‘q. Biroq unda futbolchiga mashg‘ulot o‘tkazish va yashash uchun kerakli bo‘lgan barcha jihozlar muhayyo.

Futbolchining yana bir uyi Misr poytaxti Qohirada joylashgan. 2 yil oldin tarmoqda Salohning manzili paydo bo‘ladi, shundan so‘ng uy atrofida ko‘plab odamlar to‘plana boshlaydi. Har safar futbolchini ko‘rish va u bilan suratga tushish uchun keladiganlar soni ko‘payib boraverdi. Shu tariqa politsiya Salohning uyini to‘sib qo‘yishga majbur bo‘ldi. Shundan keyingina uy atrofida odamlar soni kamayishni boshladi.

Saloh qanday mashinalarda yuradi?

Ferrari California – 250 ming dollar

Mashinaning maksimal tezligi 316 km/soatni tashkil qiladi, u tezligini atigi 4 soniyada 100 km/soatgacha ko‘tarishi mumkin. Mazkur avtomobil 2014-yilda Jenevada namoyish etilgan.

Bentley Continental GT – 335 ming dollar

Xususiyatlari jihatidan ushbu mashina oldingisidan ustunroq turadi. Uning maksimal tezligi 333 km/soatga teng bo‘lib, 3,7 soniyada uning spidometridagi ko‘rsatkichi 100 chizig‘iga yetadi. Aytishlaricha, ushbu model bor-yo‘g‘i 4 kishiga mo‘ljallangan ekan.

Salohning oilasi qanday?

Muhammad Saloh 2013-yilda, 21 yoshida Maji ismli qizga uylanib, oila quradi. To‘y marosimi futbolchining ona qishlog‘i Nagri bo‘lib o‘tgan. 2014-yilda futbolchining oilasida qiz farzand dunyoga keladi. Muhammad unga Makka deb ism qo‘yadi. Futbolchining aytishicha, u 4 nafar farzand ko‘rishni orzu qiladi.

Salohning do‘stlari kim?

Muhammad Saloh – juda xushchaqchaq inson. Biroq u “Liverpul”da faqat ikki o‘yinchi bilan do‘stlashgan. Afsuski, ularning har ikkalasi ham hozir boshqa jamoalarda harakat qiladi.

Filippe Koutinyo

Koutinyo bilan Saloh klubga qo‘shilgandan so‘ng do‘stlashgan. Ular mashg‘ulotlar paytida va kiyinish xonasida ko‘p vaqtni birga o‘tkazishgan, tabiiyki, maydonda ham Saloh aynan braziliyalikning uzatmalaridan keyin tez-tez gol urib turardi. Ammo 2018-yilda Filippe “Barselona”ga yo‘l oldi. Hozirda futbolchilar bir-birlarini juda kam ko‘radi.

Deyan Lovren

Futbolchilar jamoa yig‘inida do‘stlashib qolgan. Do‘stlar juda ko‘p umumiy jihatlarga ega. Misol uchun, ularning har ikkalasi ham qiyin bolalikka ega. Lovren “Zenit”ga o‘tganiga qadar, ular juda ko‘p vaqtni birga o‘tkazgan.

• Saloh kompyuter o‘yinlarini yaxshi ko‘radi. U soatlab FIFA o‘ynashi mumkin.
• Futbolchi tez-tez restoranlarga tashrif buyurib turadi. Uning sevimli taomi esa pitssa.
• Misrlik fotosessiyalarda qatnashishni yaxshi ko‘radi va ularni  tolmay Instagram’dagi sahifasiga joylab boradi. Albatta, u buning uchun yaxshigina pul oladi.

Salohning yana bir tahsinga sazovor xususiyati – bu uning xayriya ishlari bilan shug‘ullanishidir. U doimiy ravishda tug‘ilgan shahri aholisiga yordam berib keladi. 2018-yilda u shahar aholisini suv bilan ta’minlagandi. Bu unga 450 ming dollarga tushgan, shuningdek, u o‘sha shaharda maktab, kasalxona va sport maydonchalarini qurilishiga ham pul o‘tkazgan. Bundan tashqari, futbolchi to‘y qilishga qurbi yetmaydiganlarga ham ko‘mak berib keladi. U hatto otasining uyini o‘margan o‘g‘ri bilan uchrashib, unga pul berib, ish topishda ham yordam bergan. Shuningdek, Saloh otasidan da’vo arizasini qaytarib olishni so‘ragan.

Shunchaki bravo, Muhammad Saloh!