Latviya hukumati koronavirus tarqalishining oldini olish uchun 9-noyabrdan 6-dekabrga qadar mamlakatda favqulodda holat e’lon qildi, deb xabar beradi “Korrespondent.net”.
Ushbu davr oralig‘ida binolar ichida o‘tkaziladigan barcha turdagi ommaviy tadbirlar taqiqlangan. Shaxsiy tadbirlarda 10 kishidan ko‘p bo‘lmagan odamlar va ikkitagacha xo‘jalik a’zolarining yig‘ilishga ruxsat etilgan.
Barcha barlar, tungi klublar, akvaparklar, savdo ko‘ngilochar markazlardagi bolalar xonalari yopiladi.
Savdo-ko‘ngilochar markazlardagi oziq-ovqat, gigiyenik tovarlar, xo‘jalik mollari, shuningdek, dorixonalar, optika, kitob do‘konlaridan tashqari aksariyat do‘konlar yopiladi. Go‘zallik salonlari va tatu-salonlar ham yopiladi, sartaroshxonalar oldindan yozilgan mijozlarga xizmat ko‘rsatishi mumkin. Restoran va barlar taomlarni olib ketish orqali sotishi mumkin — aeroport va ish joylaridan tashqari.
Bolalar bog‘chalari yopiqligicha qoladi. 1—6-sinf o‘quvchilari sinf xonalarida ishlashni davom etadi, qolgan o‘quvchi va OTM talabalari masofadan turib ta’lim olishga o‘tadi. Shu bilan birga, mutaxassis va repetitorlar bilan individual mashg‘ulotlar o‘tkazishga ruxsat beriladi.
Ko‘rgazma markazlari, madaniyat muassasalari, sport zallar va diniy tashkilotlar 20:00 dan 06:00 ga qadar yopiq qoladi. Muzey va ko‘rgazma markazlarida madaniy tadbirlar o‘tkazish va guruhlar uchun, agar ular bitta uy xo‘jaligi a’zolari bo‘lmasa, ekskursiyalar tashkil etish taqiqlanadi.
O‘rnatilgan tartib-qoidalarni buzgan fuqarolar 2 ming yevrogacha, yuridik shaxslar — 5 ming yevrogacha jarimaga tortiladi.
Avvalroq Gretsiyada umummilliy karantin tartibi e’lon qilingani, Italiyaning barcha hududida koronavirus sababli komendantlik soati joriy etilgani, Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlangani to‘g‘risida xabar berilgandi.
Izoh (0)