Ortda qolgan bir sutka ichida Rossiyada 7-noyabr holatiga ko‘ra, koronavirus yuqtirib olish bilan bog‘liq 20 396 ta holat qayd etildi. Bu haqda koronavirusga qarshi tezkor federal shtab xabar qilgan.
Bir kun avval Rossiyada kasallanish bo‘yicha 20 582 ta holat aniqlangani va pandemiya boshlanganidan beri kuzatilgan sutkalik antirekord yangilangani haqida xabar berilgandi.
Eng ko‘p kasallanish holatlari Moskva (sutka davomida 5829 ta) va Sankt-Peterburgda (bir sutka ichida 1258 ta) kuzatilgan.
Rossiyada COVID-19 pandemiyasi boshlaganidan beri jami 1 753 836 ta kasallanish holati qayd etilgan.
Ortda qolgan bir sutka davomida 364 kishi infeksiya asoratlari oqibatida vafot etgan. Rossiyada koronavirus infeksiyasi tarqala boshlaganidan buyon jami 30 251 kishi kasallik va uning asoratlari tufayli hayotdan ko‘z yumgan.
1 312 927 nafar bemor kasallikdan tuzalgan, sog‘ayish bo‘yicha sutkalik ko‘rsatkich 16 803 nafarni tashkil qiladi.
Rossiyada bir sutkada 550 mingta test olingan (bir kun avval ushbu raqam 524 mingtani tashkil qilgan), pandemiya boshlanganidan beri 64 millionta laborator testlar amalga oshirilgan, deyiladi Rospotrebnadzor xabarida.
“Rospotrebnadzor” rahbari Anna Popova o‘zi imzolagan qaror bilan 28-oktabrdan Rossiya fuqarolariga odamlar ommaviy to‘planadigan joylarda, transportda, avtomobil turargohlarida va liftlarda himoya niqoblarini taqish majburiy deb belgilangan. Transportda, taksilarda, do‘konlarda, restoranlarda va teatrlarda dezinfeksiya rejimi kuchaytirilgan.
Rossiyalik virusolog, professor Viktor Zuyevning aytishicha, mamlakatda epidemiologik vaziyat 2021-yil yozida barqarorlashadi. “Vektor” virusologiya va biotexnologiya davlat ilmiy markazi bosh direktori o‘rinbosari Aleksandr Agafonovning fikricha, koronavirus infeksiyasi ustidan nazoratni vaksina yordamida o‘rnatish mumkin.
Izoh (0)