Латвия ҳукумати коронавирус тарқалишининг олдини олиш учун 9 ноябрдан 6 декабрга қадар мамлакатда фавқулодда ҳолат эълон қилди, деб хабар беради «Korrespondent.net».
Ушбу давр оралиғида бинолар ичида ўтказиладиган барча турдаги оммавий тадбирлар тақиқланган. Шахсий тадбирларда 10 кишидан кўп бўлмаган одамлар ва иккитагача хўжалик аъзоларининг йиғилишга рухсат этилган.
Барча барлар, тунги клублар, аквапарклар, савдо кўнгилочар марказлардаги болалар хоналари ёпилади.
Савдо-кўнгилочар марказлардаги озиқ-овқат, гигиеник товарлар, хўжалик моллари, шунингдек, дорихоналар, оптика, китоб дўконларидан ташқари аксарият дўконлар ёпилади. Гўзаллик салонлари ва тату-салонлар ҳам ёпилади, сартарошхоналар олдиндан ёзилган мижозларга хизмат кўрсатиши мумкин. Ресторан ва барлар таомларни олиб кетиш орқали сотиши мумкин — аэропорт ва иш жойларидан ташқари.
Болалар боғчалари ёпиқлигича қолади. 1—6-синф ўқувчилари синф хоналарида ишлашни давом этади, қолган ўқувчи ва ОТМ талабалари масофадан туриб таълим олишга ўтади. Шу билан бирга, мутахассис ва репетиторлар билан индивидуал машғулотлар ўтказишга рухсат берилади.
Кўргазма марказлари, маданият муассасалари, спорт заллар ва диний ташкилотлар 20:00 дан 06:00 га қадар ёпиқ қолади. Музей ва кўргазма марказларида маданий тадбирлар ўтказиш ва гуруҳлар учун, агар улар битта уй хўжалиги аъзолари бўлмаса, экскурсиялар ташкил этиш тақиқланади.
Ўрнатилган тартиб-қоидаларни бузган фуқаролар 2 минг еврогача, юридик шахслар — 5 минг еврогача жаримага тортилади.
Аввалроқ Грецияда умуммиллий карантин тартиби эълон қилингани, Италиянинг барча ҳудудида коронавирус сабабли комендантлик соати жорий этилгани, Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқлангани тўғрисида хабар берилганди.
Изоҳ (0)