Kattaqo‘rg‘onda yo‘llarni ta’mirdan chiqarilgani to‘g‘risida qalbaki hujjatlar tayyorlab, 2,4 mlrd so‘mni talon-toroj qilish holati aniqlandi

Bosh prokuraturada tashkil etilgan korrupsiya masalalariga oid idoralararo yig‘ilishda bosh prokuror Nig‘matilla Yo‘ldoshev  mamlakatning transport sohasida korrupsiyaviy huquqbuzarliklarning sabab va shart-sharoitlari bartaraf etilmaganligi ma’lum qildi. Bu haqda “Daryo” muxbiri xabar berdi.

Bosh prokurorning ma’lum qilishicha, so‘nggi ikki yilda Transport vazirligi va sohadagi korxonalar xodimlaridan 57 nafari korrupsiyaviy jinoyatlarga qo‘l urgan.

Tahlillarga ko‘ra, tizimda yo‘l qurilishi uchun ajratilgan budjet mablag‘larini talon-toroj qilish, yo‘lovchi va yuk tashish xizmatidan tushgan pullarni o‘zlashtirish bilan bog‘liq jinoyatlar sodir etilmoqda.

Xususan, “Kattaqo‘rg‘on tuman yo‘llardan foydalanish” korxonasi direktori Rustamov, bosh hisobchi Shodiyev hamda muqaddam shu korxonada sodir etgan qator jinoyatlari uchun sudlanib, korxonada faoliyatini yana davom ettirib kelayotgan jinoiy sheriklari: bosh muhandis Tursunov, bo‘lim boshlig‘i Tursunov va ish yurituvchi Nizomovlar bilan til biriktirib yo‘l ta’miri uchun ajratilgan budjet pullarini talon-toroj qilib kelgan. Ular 17 ta ichki yo‘llarni ta’mirlash ishlari amalga oshirilgan bo‘lsa-da,  umuman ta’mir ko‘rmagan yana 20 ta yo‘lni ta’mirdan chiqarganliklari haqida qalbaki hujjatlarni tuzib, 2,4 milliard so‘m budjet mablag‘larini o‘margan.

Bu qing‘ir ishlarining silliq bitishida jinoyatchilarga buyurtmachi “Samarqand mintaqaviy yo‘llar buyurtmachi xizmati davlat korxonasi” bosh muhandisi Mardonov hamda korxona bosh mutaxassisi, muqaddam aynan shu korxonada talon-torojliklar sodir etgani uchun sudlangan Salohiddinovlar yordam berib, bajarilmagan ishlarga ko‘z yumib kelgan.

Milliardlab budjet pullarini o‘zlashtirgan Rustamovga sud hukmi bilan 22 million so‘m jarima jazosi tayinlangan. Uning 6 nafar sheriklari muayyan huquqdan mahrum qilingan bo‘lsa-da, Rustamovga bunday jazo belgilangamaganligi bois hozir ham u o‘z ishini muvaffaqiyatli davom ettirmoqda. Eng qizig‘i, sud jazo tayinlashda Xalq deputatlari Kattaqo‘rg‘on shahri tuman kengashining 2020-yil 7-sentabrdagi Rustamov jinoyat sodir etmaganligi, unga muayyan huquqdan mahrum qilish qo‘shimcha jazosini tayinlamaslik to‘g‘risidagi iltimosnomasini asos qilib olgan. Vaholanki, aybdorlik masalasini faqat va faqat sud hal qiladi. Xalq deputatlari mahalliy kengashining tergov va sud ishlariga aralashib bunday iltimosnomalar kiritishi, jinoyatchiga xayrixoh bo‘lishi aslida korrupsiyaga sharoit yaratuvchi omil emasmi?

Avtomobil yo‘llar qo‘mitasi tizimiga kiruvchi bir xona buyurtmachi bo‘lib budjet mablag‘larining talanishiga sharoit yaratgan bo‘lsa, ikkinchi, pudratchi bo‘lib bajarilmagan ishlar uchun budjet mablag‘larini o‘zlashtirsa, eng achinarlisi, bu qing‘irliklarni oldin ham xuddi shunday jinoyatlar uchun sudlanganlar bajarsa, nega yuqori turuvchi idoralar jim?

Nig‘matilla Yo‘ldoshev, bosh prokuror