O‘zbekistonda o‘tgan ikki yilda 1 ming 986 nafar mansabdor shaxs korrupsiyaviy jinoyatlarni sodir etganligi uchun jinoiy javobgarlikka tortilgan. Bu haqda 7-noyabr kuni Bosh prokuraturada tashkil etilgan korrupsiya masalalariga oid idoralararo yig‘ilishda ma’lum qilindi.
Ta’kidlanishicha, bunday jinoyatlar oqibatida yetkazilgan moddiy zarar miqdori 2 trillion so‘mdan oshgan.
“Ochig‘ini aytsak, bugun ayrim sohalar, vazirlik va idoralarda korrupsiyaviy qonun buzilishlar, poraxo‘rlik va mansab suiiste’molliklari gazak olmoqda”, — deydi Yo‘ldoshev. Bosh prokuratura rahbari budjet mablag‘laridan maqsadli va oqilona foydalanish yil sayin dolzarb muammoga aylanib borayotganligini tashvish bilan ta’kidladi. Jumladan, eng quyi pog‘onalardan boshlab respublika darajasigacha budjet mablag‘larini talon-toroj qilishning turli korrupsiyaviy sxemalari keng ildiz otganligini ko‘rsatgan.
Yig‘ilishda prokuraturaning nazorat tadbirlari hamda tergov natijalari tahlili asosida korrupsiya eng ko‘p uchrayotgan sohalar, vazirlik va idoralar kesimida aniq misollar va raqamlarda ko‘rsatib berilgan. Iqtisodiy sohadagi korrupsiyaviy holatlar asosan budjet mablag‘laridan foydalanish jarayonida sodir etilayotgani bildirilgan.
“So‘nggi ikki yilda respublika bo‘yicha, ahamiyat bering, 371 milliard so‘m budjet mablag‘larini talon-toroj qilish holatlari aniqlanib, bu qilmishlar uchun 2 ming 477 nafar shaxs jinoiy javobgarlikka tortilgan. Bunday holatlar, asosan, qurilish, qishloq va suv xo‘jaliklari, bank, energetika, ta’lim va sog‘liqni saqlash sohalariga to‘g‘ri keladi”, — deydi Nig‘matilla Yo‘ldoshev.
Namangan, Surxondaryo, Jizzax, Qashqadaryo, Samarqand, Andijon, Farg‘ona, Toshkent viloyati va Toshkent shahrida mazkur jinoiy holatlarning salmog‘i yuqoriligicha saqlanib qolinayotgani bildirildi. Budjet mablag‘larining ratsional taqsimlanishi va maqsadli ishlatilishi yuzasidan davlat nazoratiga mas’ul moliya organlarining o‘ziga yuklatilgan vazifalarni talab darajasida bajarmayotganligi ham aytib o‘tilgan.
Avvalroq o‘tgan ikki yilda moliya organlarining 41 nafar xodimi korrupsiya holatlari uchun jinoiy javobgarlikka tortilgani to‘g‘risida xabar berilgandi.
Izoh (0)