“Grim uchun ajratilgan mablag‘ga ‘O‘rikzor’dan arzon kosmetika sotib olgan”. Bosh prokuror Madaniyat vazirligidagi jinoiy sxema haqida

Bosh prokuraturada tashkil etilgan korrupsiya masalalariga oid idoralararo yig‘ilishda Madaniyat, sog‘liqni saqlash, jismoniy tarbiya va sport, xalq ta’limi, axborot texnologiyalari va kommunikatsiyalarini rivojlantirish vazirliklari hamda Ekologiya va atrof-muhitni muhofaza qilish qo‘mitasi tizimi ham korrupsiyadan xoli emasligi ko‘rsatib o‘tildi. Bu haqda “Daryo” muxbiri xabar berdi.

So‘nggi 2 yilda Axborot texnologiyalari va kommunikatsiyalarini rivojlantirish vazirligi tizimidagi 14 nafar, Ekologiya va atrof-muhitni muhofaza qilish qo‘mitasi tizimidagi 22 nafar, Jismoniy tarbiya va sport vazirligi tizimidagi 35, Madaniyat vazirligi tizimidagi 37 nafar xodimlar turli jinoyatlarga qo‘l urishgan.

Ma’lum qilinishicha, Madaniyat vazirligining ayrim mansabdorlari o‘ziga xos jinoiy sxema yaratgan. Muqaddam o‘g‘irlik va talon-torojlik jinoyatlari uchun 7 yil ozodlikdan mahrum etish jazosini o‘tab chiqqan Ibragimov 2019-yil fevral oyida vazirlik bosh hisobchisi lavozimiga tayinlangan. U dastlab ishni tanishlari Yorbozorov va Qo‘shoqov bilan jinoiy reja tuzishdan boshlagan.

U o‘zining jinoiy rejalariga ko‘ra, vazirlik xaridlarini fuqaro Qo‘shoqov va uning yaqinlariga tegishli firmalarga berish uchun ulardan 26 ming dollar ulush olgan.

Shundan so‘ng vazirlik tizimidagi teatr, madaniyat uylari va boshqa tashkilotlarga zarur grim mahsulotlari uchun tanishi Qo‘shoqovga tegishli firmalarga 2,6 milliard so‘m o‘tkazib berilgan.

O‘z navbatida, bu firmalar grim o‘rniga “O‘rikzor” bozoridan 264 million so‘mga arzon va sifatsiz kosmetika mahsulotlarini sotib olib, uni grim ekanligi haqida soxta hujjatlarni tuzib, vazirlikka topshirgan. Vazirlik esa madaniyat muassasalariga umuman kerak bo‘lmagan bu mahsulotlarni grim sifatida soxta hujjat qilib, ularga yetkazib beradi.

“Sxemaga ko‘ra, mahsulot narxi hujjatlarda bir necha barobar qimmat ko‘rsatilib, 2,3 milliard so‘m mablag‘ talon-toroj qilingan”, — deydi bosh prokuror. 1 dona 20 ming so‘mlik ayollar pudrasi qiymati hujjatlarda haqiqiy bahosidan 57 baravar ko‘p, ya’ni 1 million 180 ming so‘m qilib ko‘rsatilgan.

Shuningdek, vazirlik ishlar boshqarmasi boshlig‘i Ochilov esa teatr va musiqiy maktablarga aslida yetkazib berilmagan mebel va musiqa anjomlari yetkazib berilgani haqida soxta hujjatlar tuzib, 1,7 milliard so‘mni o‘ziga tanish firmalarga o‘tkazib, talon-taroj qilgan.

Bundan tashqari, 13,5 milliard so‘mlik mebel va jihozlarni tanishlaridan 20,2 milliard so‘mga olish yo‘li bilan 6,7 milliard so‘m ham talon-toroj qilingan. Bu jinoiy sxema bilan 12 milliard so‘m budjet mablag‘i o‘marilgan. Bu hali tergovda aniqlangan dastlabki faktlar, hozirda ushbu shaxslar qamoqqa olingan bo‘lib, tergov harakatlari o‘tkazilmoqda. Bunga aloqador barcha shaxslar, ishtirokchilar qaysi lavozimda ishlashidan qat’iy nazar jinoiy javobgarlikka tortiladi.