Бош прокуратурада ташкил этилган коррупция масалаларига оид идоралараро йиғилишда бош прокурор Ниғматилла Йўлдошев мамлакатнинг транспорт соҳасида коррупциявий ҳуқуқбузарликларнинг сабаб ва шарт-шароитлари бартараф этилмаганлиги маълум қилди. Бу ҳақда «Дарё» мухбири хабар берди.
Бош прокурорнинг маълум қилишича, сўнгги икки йилда Транспорт вазирлиги ва соҳадаги корхоналар ходимларидан 57 нафари коррупциявий жиноятларга қўл урган.
Таҳлилларга кўра, тизимда йўл қурилиши учун ажратилган бюджет маблағларини талон-торож қилиш, йўловчи ва юк ташиш хизматидан тушган пулларни ўзлаштириш билан боғлиқ жиноятлар содир этилмоқда.
Хусусан, «Каттақўрғон туман йўллардан фойдаланиш» корхонаси директори Рустамов, бош ҳисобчи Шодиев ҳамда муқаддам шу корхонада содир этган қатор жиноятлари учун судланиб, корхонада фаолиятини яна давом эттириб келаётган жиноий шериклари: бош муҳандис Турсунов, бўлим бошлиғи Турсунов ва иш юритувчи Низомовлар билан тил бириктириб йўл таъмири учун ажратилган бюджет пулларини талон-торож қилиб келган. Улар 17 та ички йўлларни таъмирлаш ишлари амалга оширилган бўлса-да, умуман таъмир кўрмаган яна 20 та йўлни таъмирдан чиқарганликлари ҳақида қалбаки ҳужжатларни тузиб, 2,4 миллиард сўм бюджет маблағларини ўмарган.
Бу қинғир ишларининг силлиқ битишида жиноятчиларга буюртмачи «Самарқанд минтақавий йўллар буюртмачи хизмати давлат корхонаси» бош муҳандиси Мардонов ҳамда корхона бош мутахассиси, муқаддам айнан шу корхонада талон-торожликлар содир этгани учун судланган Салоҳиддиновлар ёрдам бериб, бажарилмаган ишларга кўз юмиб келган.
Миллиардлаб бюджет пулларини ўзлаштирган Рустамовга суд ҳукми билан 22 миллион сўм жарима жазоси тайинланган. Унинг 6 нафар шериклари муайян ҳуқуқдан маҳрум қилинган бўлса-да, Рустамовга бундай жазо белгилангамаганлиги боис ҳозир ҳам у ўз ишини муваффақиятли давом эттирмоқда. Энг қизиғи, суд жазо тайинлашда Халқ депутатлари Каттақўрғон шаҳри туман кенгашининг 2020 йил 7 сентябрдаги Рустамов жиноят содир этмаганлиги, унга муайян ҳуқуқдан маҳрум қилиш қўшимча жазосини тайинламаслик тўғрисидаги илтимосномасини асос қилиб олган. Ваҳоланки, айбдорлик масаласини фақат ва фақат суд ҳал қилади. Халқ депутатлари маҳаллий кенгашининг тергов ва суд ишларига аралашиб бундай илтимосномалар киритиши, жиноятчига хайрихоҳ бўлиши аслида коррупцияга шароит яратувчи омил эмасми?Аввалроқ бош прокурор грим учун ажратилган маблағга «Ўрикзор»дан арзон косметика сотиб олган Маданият вазирлигидаги жиноий схема ҳақида маълумот берганди.Автомобиль йўллар қўмитаси тизимига кирувчи бир хона буюртмачи бўлиб бюджет маблағларининг таланишига шароит яратган бўлса, иккинчи, пудратчи бўлиб бажарилмаган ишлар учун бюджет маблағларини ўзлаштирса, энг ачинарлиси, бу қинғирликларни олдин ҳам худди шундай жиноятлар учун судланганлар бажарса, нега юқори турувчи идоралар жим?
Ниғматилла Йўлдошев, бош прокурор
Изоҳ (0)