“Bo‘stonliqdan dala hovli, Tashkent City’dan 2 ta uy va Captiva”. “Ark buloq” bojxona posti sobiq boshlig‘i olgan poralarini nimaga sarflagani ma’lum bo‘ldi

O‘zbekistonda o‘tgan ikki yilda huquqni muhofaza qiluvchi organlarning 318 nafar xodimlari jinoiy qilmishlari uchun javobgarlikka tortilgan. Bu haqda bosh prokuror Nig‘matilla Yo‘ldoshev raisligida tashkil etilgan korrupsiya masalalariga oid idoralararo yig‘ilishda ma’lum qilindi, deb xabar beradi “Daryo” muxbiri.

Javobgarlikka tortilganlarning 3 nafari departament, 4 nafari Milliy gvardiya, 5 nafari sud, 7 nafari adliya, 13 nafari prokuratura, 27 nafari bojxona, 45 nafari Majburiy ijro byurosi, 170 nafari ichki ishlar organlari xodimlari ekanligi ta’kidlandi.

Ma’lum qilinishicha, yig‘ilishda huquqni muhofaza qilish faoliyatidagi korrupsiya holatlari muhokama qilingan.

Ta’kidlanishicha, “Ark buloq” bojxona posti boshlig‘i Jalilov boshchiligidagi bir guruh bojxona xodimlari pora evaziga turli subyektlar tomonidan import qilingan tovarlar qiymatini pasaytirib ko‘rsatib, davlat manfaatlariga qariyb 9 milliard so‘m zarar yetkazgan.

Tergov jarayonida Jalilovning uyida o‘tkazilgan tintuvda pora sifatida olingan 311 ming dollar naqd pul topilgan.

Bundan tashqari, jinoiy yo‘l bilan topilgan pullar evaziga Bo‘stonliq tumanida 8 sotixli dala hovli qurganligi, Tashkent City majmuasidan 2 ta xonadon va 1 ta noturar joy hamda Captiva avtomashinasini sotib olganligi aniqlangan. 1 ta post boshlig‘i poraxo‘rlik ketidan odamning aqlini shoshiradigan darajada mol-mulk to‘plasa, bunga hech kim e’tibor bermasa, qanday tushunish mumkin? Eng e’tiborli jihati, Jalilov hatto oliy ma’lumotli bo‘lmasada, 4 yil davomida juda katta tovar oqimiga ega bo‘lgan yirik post boshlig‘idek mas’ul lavozimda ishlab kelgan.

“Hozirda Jalilov va uning sheriklari sud oldida javob bermoqda”, — deydi bosh prokuror.

Eslatib o‘tamiz, Davlat bojxona qo‘mitasi raisi Murodjon Azimov 2020-yil 12-fevral kuni Toshkent shahar bojxona boshqarmasida navbatdan tashqari yig‘ilish o‘tkazgandi. O‘sha yig‘ilishda Toshkent shahar bojxona boshqarmasi boshlig‘ining birinchi o‘rinbosari, 2 nafar o‘rinbosar, boshqarmaning 4 nafar bo‘lim boshlig‘i, 2 nafar bojxona posti boshlig‘i, “Ark-buloq” bojxona posti boshlig‘i o‘rinbosari egallab turgan lavozimidan ozod qilingandi.

Shuningdek, prezident Shavkat Mirziyoyev 2020-yil 31-yanvar kuni bo‘lib o‘tgan yig‘ilishda bojxona postlaridan birining rahbari hibsga olingani va uning uyidan 400 ming dollar topilgani haqida gapirgan edi. Iyul oxirlarida esa Toshkent shahar bojxona boshqarmasi boshlig‘i Botir Dadamatov ishdan olingandi.