Buxoro viloyati hokimligi majlislar zalida 7-noyabr kuni faollar yig‘ilishi bo‘lib o‘tdi.
Viloyat hokimligi matbuot xizmatining ma’lum qilishicha, yig‘ilishda O‘zbekiston bosh vaziri Abdulla Aripov, O‘zbekiston Prezidenti administratsiyasi rahbari Zaynilobiddin Nizomiddinov, viloyat hokimi o‘rinbosarlari, shahar va tumanlar hokimlari, xalq deputatlari viloyat kengashi deputatlari, Oliy Majlis Senati a’zolari, huquqni muhofaza qiluvchi idoralar, viloyat korxona va tashkilotlari rahbarlari hamda ommaviy axborot vositalari vakillari ishtirok etdi.
Yig‘ilishda tashkiliy masala ko‘rildi Zaynilobiddin Nizomiddinov ayni paytga qadar “O‘zsanoatqurilishmateriallari” uyushmasi boshqaruvi raisi lavozimida faoliyat yuritib kelgan Zaripov Botir Komilovich Buxoro viloyati hokimi vazifasini bajaruvchi etib tayinlanganligi to‘g‘risidagi Prezident farmonini o‘qib eshittirdi.
Viloyatga yetakchilik qilib kelayotgan Farhod Umarov esa Buxoro viloyati hokimining moliya-iqtisodiyot va kambag‘alchilikni qisqartirish masalalari bo‘yicha birinchi o‘rinbosari lavozimida faoliyatini davom ettiradigan bo‘ldi.
Buxoro viloyati hokimi vazifasini bajaruvchi Karim Kamolov 22-avgust kuni koronavirus asoratlaridan vafot etganidan so‘ng Farhod Umarov viloyat hokimi vazifasini vaqtincha bajaruvchi etib tayinlangandi.
Ma’lumot uchun, Botir Zaripov 1969-yil 20-noyabrda G‘ijduvon tumanida tug‘ilgan. 1997-yilda Toshkent moliya institutini tamomlagan. 1997—1998-yillarda Tashqi iqtisodiy faoliyat Milliy bankining Buxoro bo‘linmasi Yuridik va jismoniy shaxslarni kreditlashtirish bo‘limi boshlig‘i, 1998-yilda TIF Milliy bankining Buxoro bo‘linmasi Qorovulbozor filiali qurilishi boshlig‘i, 1998—2005-yillarda TIF Milliy bankining Buxoro bo‘linmasi Qorovulbozor filiali boshqaruvchisi, 2005—2006-yillarda Markaziy bankning Buxoro viloyati bosh boshqarmasi boshlig‘ining birinchi o‘rinbosari — Inkassatsiya boshqarmasi boshlig‘i, 2006-yilda Markaziy bankining Buxoro viloyati bosh boshqarmasi boshlig‘ining birinchi o‘rinbosari, 2006—2008-yillarda TIF Milliy bankining Buxoro bo‘linmasi boshqaruvchisi, 2008—2012-yillarda Markaziy bank boshqaruvi raisining o‘rinbosari, 2012—2013-yillarda Markaziy bankning Nobank kredit tashkilotlarini nazorat qilish va tartibga solish departamenti direktori, 2013—2015-yillarda Markaziy bankning Kredit tashkilotlari faoliyatini litsenziyalash va tartibga solish departamenti direktori, 2015—2016-yillarda AT “Agrobank” boshqaruvi raisining birinchi o‘rinbosari, 2016—2019-yillarda “O‘zqurilishmateriallari” aksiyadorlik jamiyati boshqaruvi raisi lavozimlarida ishlagan. 2019-yil 4-apreldan esa yangidan tashkil etilgan “O‘zsanoatqurilishmateriallari” uyushmasi boshqaruvi raisi vazifasida ishlab kelayotgan edi.
U “O‘zbekiston Respublikasi mustaqilligining yigirma to‘qqiz yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhini mukofotlash to‘g‘risida”gi farmoniga ko‘ra “Sodiq xizmatlari uchun” medali bilan taqdirlangan.
Izoh (0)