Novosibirsklik restavrator Boris Bespalchiy 1965-yilda ishlab chiqarilgan uchinchi seriyaga oid “GAZ-21” avtomobilini ikki yil davomida qayta tikladi, deb xabar beradi Motor.
Qayta tiklash jarayonida Bespalchiy “Volga”ga biroz o‘zgartirish kiritishga qaror qilib, modelning avvalgi nusxalarida tegishli ehtiyot qismlarni qidirib ko‘rgan. Natijada avtomobil yulduzchaga ega xromlangan radiator panjarasiga ega bo‘lgan, kapotidan esa xuddi “GAZ-21”ning birinchi seriyasidagi kabi bug‘u figurasi paydo bo‘lgan. “Volga” uchinchi seriyadan boshlab kapot ustidagi bezakdan voz kechgan — u piyodalar uchun xavfsiz emas deb topilgan.
Restavratorning so‘zlariga ko‘ra, noyob “Volga”ni qayta tiklash oson kechmagan: 55 yoshli avtomobilning kuzovi zanglab ketgan. Shuningdek, mashinaning yuqori qismiga ishlatilgan xromli bezaklar vaqt o‘tishi bilan shikastlangani qo‘shimcha murakkablikni yuzaga keltirgan.
Achinarli ahvolda bo‘lgan salon ham to‘liq qayta tiklangan: divanlar qayta tikilgan va sun’iy charm bilan qoplangan. Yorilgan plastik elementlarni yangisiga almashtirishga to‘g‘ri kelgan. E’tiborli jihati, rul chambaragi original chizmalar asosida “Volga” uchun maxsus yasalgan.
75 ot kuchiga ega zavod motorining barcha porshenlari almashtirilgan va klapan mexanizmlari ta’mirlangan, alyuminiyli yangi silindrlar bloki o‘rnatilgan. Bespalchiy avtomobilni to‘liq qayta ta’mirlash uchun salkam ikki yil vaqtini sarflagan.
Mavzuga doir: KGB xodimlariga tegishli Toyota V6 dvigateli o‘rnatilgan ideal holatdagi “Volga” sotuvga qo‘yildi
Mavzuga doir: Sankt-Peterburgda Mercedes-Benz bazasida yaratilgan “Volga” 210 ming dollar evaziga sotuvga qo‘yildi (foto)
Izoh (0)