Дональд Трамп январь ойида президентликдан кетса, Twitter ижтимоий тармоғи уни махсус имтиёзлардан маҳрум қилади. Бу ҳақда ижтимоий тармоқ вакилига таяниб, Bloomberg хабар берди.
Бу шуни англатадики, Трампнинг ижтимоий тармоқ қоидаларини бузувчи твитлари уни вақтинча ёки бутунлай блоклаш учун асос бўла олади. Ҳозирда ижтимоий тармоқ бу каби твитларни ажратиб ёки яшириб қўймоқда, аммо президентнинг жамоатчиликдаги обрўсидан келиб чиқиб, ўчириб ташламаяпти.
Ижтимоий тармоқ вакилининг сўзларига кўра, Twitter бу — одамлар очиқ ва омма олдида етакчиларга бемалол жавоб берадиган ҳамда уларни масъулият остида ушлаб турадиган жой. «Шуни инобатга олган ҳолда айрим тивитлар қоидани бузган бўлса-да, уларда жамоатчилик манфаати ётади», — дейди у. Шунингдек, вакил бу каби қоида бошқа оддий фойдаланувчилар каби АҚШнинг собиқ президентларига ҳам тааллуқли эканлигини қайд этган.
АҚШда президентлик сайловлари 3 ноябрь куни бўлиб ўтди, овозларни санаш жараёни эса ҳамон давом этмоқда. Шундан буён Twitter Дональд Трампнинг сайловга оид саккизта твитини овоз беришда чалғитувчи аҳамиятга эга деб ажратиб қўйган.
Аввалроқ АҚШнинг амалдаги президенти Дональд Трамп социологлар ва газеталарни хато баҳолаш ҳамда сайловчиларга босим ўтказишда айблаган эди. Байден эса америкаликларни сайлов натижаларини кутишда хотиржам бўлишга чақирган.
Эслатиб ўтамиз, май ойида Трамп Twitter’ни сайлов жараёнларига аралашганликда айблаганди. Шундан сўнг у ижтимоий тармоқларни ёпиб юбориш билан таҳдид қилган эди.
Изоҳ (0)