Buxoroda Milliy gvardiyaning Qo‘riqlash bo‘linmalari xodimlari hamda jamoalari o‘rtasida qo‘l jangi sport musobaqasining respublika turniri o‘tkazildi. Turnir g‘oliblarining har biriga pul mukofoti berilgan. Bu haqda “Daryo”ga Milliy gvardiyaning viloyat boshqarmasi axborot xizmati rahbari Farruh Qilichev ma’lum qildi.
Ta’kidlanishicha, mazkur sport turniri ikki kun davom etgan. Unda mamlakatning 14 ta hududidan kelgan jamoa vakillari to‘qqiz vazn toifasida bellashgan. 150 dan ortiq tizim xodimlari qatnashgan bahslarda Buxoro jamoasining qo‘li baland kelgan.
Natijalarga ko‘ra, umumjamoa hisobida Milliy gvardiya Buxoro viloyati Qo‘riqlash boshqarmasi xodimlari tarkibidan iborat jamoa 1-o‘rinni egallagan. 2-o‘rinni Sirdaryo viloyati, 3-o‘rinni esa Toshkent viloyati Qo‘riqlash boshqarmasi jamoasi qo‘lga kiritgan.
Birinchi o‘rin sohiblarining har biriga 1 million 300 ming so‘mdan, ikkinchi o‘rin egalariga 1 million 100 ming so‘mdan hamda uchinchi o‘rinni qo‘lga kiritgan ishtirokchilarga 850 ming so‘mdan pul mukofoti berilgan. Boshqa ishtirokchilar esa qimmatbaho sovrinlarga ega bo‘lgan.
“Mazkur musobaqa yigitlarimizning matonati va irodasini yana bir karra tobladi, desam adashmayman. Nafaqat yigitlar, balki tizimda faoliyat yuritayotgan qizlarimiz ham g‘ayratlarini namoyish etishdi”, — dedi Milliy gvardiyaning viloyat boshqarmasi boshlig‘i, podpolkovnik Sherzod Jumayev.
Izoh (0)