Angren va Xorazmdagi shakar zavodlari ommaviy ravishda xodimlarini ishdan bo‘shatishni boshlangani haqida xabar berilgandi.
Bandlik va mehnat munosabatlari vazirligi Davlat mehnat inspeksiyasi tomonidan ushbu holat bo‘yicha o‘tkazilgan o‘rganish davomida “Angren shakar” va “Xorazm shakar” mas’uliyati cheklangan jamiyatlarida ishchi xodimlar jamiyat tashabbusi bilan ommaviy ravishda ishdan bo‘shatilmaganligi, shuningdek, koronavirus pandemiyasi sababli ish faoliyatini vaqtinchalik to‘xtatgani, hozirgi kunda zavodni ishga tushirish choralari ko‘rilayotganligi aniqlangan. Bu haqda vazirlik axborot xizmati xabar qildi.
Mavzuga doir: Angren shakar zavodida 150 nafar xodim ishdan bo‘shatilgani ma’lum qilindi. Ularning soni yana ortishi mumkin
Qayd etilishicha, “Xorazm shakar” mas’uliyati cheklangan jamiyatida 1081 nafar ishchi bilan mehnat shartnomasi rasmiylashtirilgan bo‘lib, hozirgi kunda 418 nafar ishchi xodimlar korxona o‘z ish faoliyatini qayta tiklagunga qadar ta’mirlash ishlari bilan shug‘ullanib kelayotganligi, faqatgina o‘z xohishiga ko‘ra mehnat shartnomasini bekor qilishni so‘rab murojaat qilgan xodimlar ishdan bo‘shatilganligi ma’lum bo‘lgan.
“Angren shakar” mas’uliyati cheklangan jamiyatida esa hozirgi kunda 550 nafar xodim bo‘lib, 2020-yilning iyun oyidan oktabr oyiga qadar jami 170 nafar xodim bilan taraflarning kelishuviga ko‘ra mehnat shartnomalari bekor qilingan.
Shuningdek, mehnat shartnomasini bekor qilish bilan bog‘liq barcha xarajatlar o‘z vaqtida to‘lab berilgan. Karantin cheklovlari o‘rnatilganligi korxonaning shakar oldi-sotdisiga jiddiy zarar yetkazganligi sababli jamiyat faoliyatini 2020-yil iyun oyida to‘xtatilishi munosabati bilan korxona xodimlarining xohishiga binoan mehnat ta’tillari va o‘z hisobidan ta’tillar berilgan. 2020-yilning sentabr–oktabr oylari uchun esa xodimlarga o‘rtacha oylik ish haqi to‘lab berilgan.
Mehnat kodeksining 102-moddasida ish beruvchi kamida 2 oy oldin har bir xodimning kasbi, mutaxassisligi, malakasi va mehnat haqi miqdorini ko‘rsatgan holda bo‘lajak ishdan ozod qilish to‘g‘risidagi ma’lumotlarni mahalliy mehnat organiga ham ma’lum qilishi belgilangan bo‘lib, hozirgi kunga qadar Bandlik va mehnat munosabatlari vazirligining tuman bandlikka ko‘maklashish markazlariga “Angren shakar” va “Xorazm shakar” mas’uliyati cheklangan jamiyati ishchilari ommaviy ravishda ishdan bo‘shatilayotganligi to‘g‘risidagi ma’lumotlar taqdim etilmagan.
O‘rganish natijalariga ko‘ra, Davlat mehnat inspeksiyasi tomonidan ijtimoiy tarmoqlarda e’lon qilingan holatlarniтп oldini olish maqsadida “Angren shakar” va “Xorazm shakar” mas’uliyati cheklangan jamiyati ishchilariga mehnat ta’tillarini va ish haqlarini mehnat qonunchiligiga muvofiq belgilangan tartibda va o‘z vaqtida berish, xodimlarni ishdan bo‘shatishda Mehnat kodeksi talablariga qat’iy rioya qilish bo‘yicha yozma ko‘rsatmalar berilgan.
Eslatib o‘tamiz, 2020-yilning iyul o‘rtalarida O‘zbekistonning ikkita eng yirik shakar zavodi — “Angren shakar” va “Xorazm shakar” xomashyo yetishmovchiligi sababli ishlab chiqarishni to‘xtatib qo‘ygandi. “Gazeta.uz” mahalliy ishlab chiqaruvchilar import qiluvchilar bilan raqobat sababli qiyinchiliklarga duch kelayotganini yozgandi.
“Angren shakar” bosh direktori Rustam Akbarxo‘jayev va “Xorazm shakar” bosh direktori Umidjon Komilovning qo‘shma bayonotida esa yangi xomashyo partiyasi kelgunga qadar uskunalarni profilaktik tozalash ishlari olib borilayotganini ta’kidlagandi.
Ma’lumot uchun, “Angren shakar” kuniga 1000 tonna shakar ishlab chiqarish quvvatiga ega, ammo yaqin vaqtgacha ishlab chiqarish hajmi 500-600 tonnani tashkil etgan hamda savdo bir necha tonnagacha tushgan.
Izoh (0)