Qashqadaryoda maktabda o‘qib yurgan paytida tug‘ilganlik haqidagi guvohnomasini yo‘qotgan Mahliyo Bozorova 24 yoshga kirganida hujjatini qayta tiklashga erishdi. Bu haqda Yoshlar ishlari agentligining viloyat boshqarmasi ma’lum qildi.
Ta’kidlanishicha, Yoshlar ishlari agentligining viloyat boshqarmasi hamda hamkor tashkilotlar “Yoshlar daftari” xatlovini yuritib, viloyatdagi 18-30 yoshli yordamga muhtoj ayollar ro‘yxatini shakllantirmoqda.
“G‘uzor tumaniga biriktirilgan Shahrisabz tumani ishchi guruhi ‘Do‘ltali’ MFYda murakkab vaziyatga duch keldi. So‘rovnoma jarayonida 24 yoshli fuqaro Bozorova Mahliyo Fayzi qizining fuqaroligini tasdiqlovchi pasporti va guvohnomasi yo‘qligi aniqlandi. Mahliyoning aytishicha, u maktabda o‘qib yurganida tug‘ilganligi haqidagi guvohnomasini yo‘qotib qo‘ygan. Aksiga olib, maktab ma’muriyati ham hujjatingni yo‘qotib qo‘ydik deya, shahodatnoma bermagan”, — deyiladi boshqarma axborot xizmati bergan ma’lumotda.
Aytilishicha, G‘uzor tumani hokimi Bekzod Suyunov tashabbusi bilan mas’ul tashkilotlar hamkorligida tegishli hujjatlar to‘plangan va 24 yoshli qizga guvohnoma va fuqarolik pasporti rasmiylashtirilgan.
Qo‘shimcha qilinishicha, mas’ullar Mahliyo Bozorovaga maktabni tugatganligini tasdiqlovchi shahodatnomani ham olib berishni maqsad qilgan.
Izoh (0)