Braziliya prezidenti Jair Bolsonaru koronavirus pandemiyasi tugayotganini aytdi. Uning so‘zlarini 31-oktabr kuni Globo nashriga tayanib, “RIA Novosti” ma’lum qildi.
Shu bilan birga, prezident Xitoyning Sinovac kompaniyasining koronavirus infeksiyasiga qarshi vaksinasi borasida kelishmovchilik yuzaga kelgan Braziliyaning San-Paulu shtati gubernatori Joau San-Doriyani qayd etib o‘tgan. Sinovac Xitoydagi tadqiqot kompaniyasi bo‘lib, vaksina yaratish va uni sotishga ixtisoslashgan. Kompaniya rasmiy saytida Sinovac Xitoyda vaksina texnologiyasi sohasida 12 ta patentga egaligi aytilgan.
“Pandemiya o‘z nihoyasiga yetmoqda, menimcha, u (Doria — tahr.) odamlarni tezda emlashni xohlaydi, chunki pandemiya tugaydi va u: ‘bu, albatta, mening vaksinam sharofati bilan’, deb aytadi, tushunyapsizmi?”, — degan u, shuningdek, Doria hukmronligi tugayotganligini ham aytib o‘tgan.
Bolsonaruning o‘zi yozda koronavirus bilan kasallanib chiqqandi. Virusga chalingani haqida 7-iyul kuni ma’lum qilgan. 25-iyulda esa prezident kasallikni yengganini ma’lum qildi.
Avvalroq Jair Bolsonaru mamlakat Sog‘liqni saqlash vazirligi tomonidan Xitoyda ishlab chiqarilgan COVID-19’ga qarshi CoronaVac vaksinasini sotib olish bo‘yicha tuzilgan bitimni bekor qilgandi.
Braziliya dunyoda COVID-19 pandemiyasidan eng ko‘p zarar ko‘rgan mamlakatlardan biri bo‘ldi. Ayni paytda Braziliya koronavirusga chalinganlar soni bo‘yicha dunyoda AQSh va Hindistondan keyin uchinchi o‘rinda. Mamlakatda virus bilan 5,5 million kishi kasallangan, ularning 4,9 million nafari sog‘aygan, 159 ming kishi COVID-19 qurboniga aylangan.
Izoh (0)