O‘zbekistonda 2020-yilgi paxta yig‘im-terimi mavsumida joylarda 2 570 dan ortiq tashkilot, fermer xo‘jaligi va klasterlarda o‘tkazilgan monitoring natijasida mehnat munosabatlariga rioya qilinishi yuzasidan 158 nafar mansabdor shaxs ma’muriy javobgarlikka tortilgan. Bu haqda Bandlik va mehnat munosabatlari vazirligi matbuot xizmati xabar berdi.
Qayd etilishicha, bunda 35 nafar mansabdor shaxsga majburiy mehnatga jalb etish holati yuzasidan 372 million 410 ming so‘m miqdoridagi ma’muriy jarima, band bo‘lmagan aholini terimga jalb qilish, terimchilar uchun munosib mehnat hamda dam olish sharoitlarini yaratish, terim pullarini o‘z vaqtida va belgilangan me’yorlarda berish masalalari yuzasidan 123 nafar mansabdor shaxslarga 204 million 937 ming so‘m miqdorida Ma’muriy javobgarlik to‘g‘risidagi kodeksning 49-moddasi bo‘yicha javobgarlikka tortilgan.
Jumladan, Navoiy viloyatining Qiziltepa tumanidagi “Oqrobot yulduzi”, Navbahor tumanidagi “Xamra juma”, “Asadbek Sarvarbek”, Xatirchi tumanidagi “Oydinov Odil Nodira”, Xorazm viloyatining Shovot tumanidagi “Ergash Ro‘zimov”, Xonqa tumanidagi “Matyakubov Akmal”, Xiva tumanidagi “Said ota Madaminov”, Urganch tumanidagi “Kuramboyev Inoyat”, Yangibozor tumanidagi “G‘aniyev Rustam Ro‘zmetovich” fermer xo‘jaliklari rahbarlari paxta teruvchilar uchun yotoq joylarida va ovqatlanish bo‘yicha zarur sharoitlarni yaratib bermaganligi uchun ma‘muriy jarimaga tortilgan hamda terimchilar uchun munosib mehnat sharoitlari yaratib berilgan.
O‘tkazilgan monitoring davomida 550 dan ortiq fuqaro bilan tegishli shartnomalar rasmiylashtirilmaganligi aniqlanib, nafaqat fermer xo‘jaliklari va klasterlar rahbarlari, balki fuqarolar bilan ham tushuntirish ishlari olib borilgan va tegishli shartnomalar tuzilgan. 53 ta holatda aybdorlarga nisbatan ma’muriy javobgarlik choralari qo‘llanilgan.
Shuningdek, joylardagi 17 ta fermer xo‘jaligi va klasterlarda terim pullari o‘z vaqtida berilmagan 410 nafardan ortiq fuqaroga 173 million so‘mdan ortiq kunlik ish haqi to‘lab berilishi ta’minlangan. Bu kabi holatlar takrorlanishining oldini olish maqsadida ish beruvchilar bilan tushuntirish ishlari olib borilgan.
Izoh (0)