Бухорода Миллий гвардиянинг Қўриқлаш бўлинмалари ходимлари ҳамда жамоалари ўртасида қўл жанги спорт мусобақасининг республика турнири ўтказилди. Турнир ғолибларининг ҳар бирига пул мукофоти берилган. Бу ҳақда «Дарё»га Миллий гвардиянинг вилоят бошқармаси ахборот хизмати раҳбари Фарруҳ Қиличев маълум қилди.
Таъкидланишича, мазкур спорт турнири икки кун давом этган. Унда мамлакатнинг 14 та ҳудудидан келган жамоа вакиллари тўққиз вазн тоифасида беллашган. 150 дан ортиқ тизим ходимлари қатнашган баҳсларда Бухоро жамоасининг қўли баланд келган.
Натижаларга кўра, умумжамоа ҳисобида Миллий гвардия Бухоро вилояти Қўриқлаш бошқармаси ходимлари таркибидан иборат жамоа 1-ўринни эгаллаган. 2-ўринни Сирдарё вилояти, 3-ўринни эса Тошкент вилояти Қўриқлаш бошқармаси жамоаси қўлга киритган.
Биринчи ўрин соҳибларининг ҳар бирига 1 миллион 300 минг сўмдан, иккинчи ўрин эгаларига 1 миллион 100 минг сўмдан ҳамда учинчи ўринни қўлга киритган иштирокчиларга 850 минг сўмдан пул мукофоти берилган. Бошқа иштирокчилар эса қимматбаҳо совринларга эга бўлган.
«Мазкур мусобақа йигитларимизнинг матонати ва иродасини яна бир карра тоблади, десам адашмайман. Нафақат йигитлар, балки тизимда фаолият юритаётган қизларимиз ҳам ғайратларини намойиш этишди», — деди Миллий гвардиянинг вилоят бошқармаси бошлиғи, подполковник Шерзод Жумаев.
Изоҳ (0)