Andijon viloyati IIB YHXB YPXO 2-safarbarlik guruhi komandiri, kapitan U.Madumarov Bo‘ston tumani hududida mol o‘g‘risini qo‘lga oldi. Bu haqda YHXBB axborot xizmati xabar qilgan.
Xabarga ko‘ra, 2020-yil 29-oktabr kuni Bo‘ston tumani “Bog‘i eram” MFYda yashovchi 1986-yilda tug‘ilgan fuqaro T.O ariza bilan ichki ishlar organlariga murojaat qilgan. U bir kun oldin o‘zi ishlaydigan “Oybek-2” fermer xo‘jaligi dala shiyponi molxonasidan bozor narxi 6 million so‘mlik bir bosh qora molini noma’lum shaxslar o‘g‘irlab ketganligi haqida xabar bergan.
Shu kuni soat 20:30 larda Andijon viloyati Oltinko‘l tumani “Ijtimoyat” MFY hududidan o‘tgan 4-R-112 Farg‘ona halqa yo‘lining 138 kilometrida xizmat olib borayotgan kapitan U.Madumarov yo‘l chetida mol yetaklab ketayotgan shubhali shaxsni ko‘rib qolgan. Keyinchalik mol yetaklagan kishining Qo‘rg‘ontepa tumanida yashovchi 1991-yilda tug‘ilgan muqaddam sudlangan H.M ismli fuqaro ekanligi oydinlashgan.
H.M. o‘zini shubhali tutganligi sababli olib borilgan surishtiruv ishlari davomida ushbu qora molni o‘g‘irlab ketayotganligi ma’lum bo‘lgan. Kapitan Madumarov gumonlanuvchini tuman IIBga topshirgan.
Mazkur holat yuzasidan Bo‘ston tumani IIB huzuridagi Tergov bo‘limi tomonidan tergov harakatlari olib borilmoqda, deyiladi YHXBB xabarida.
Izoh (0)