O‘zbekistondagi umumta’lim maktablarida 2021/2022-o‘quv yilidan boshlab umumiy o‘quv soatlari doirasida jismoniy tarbiya fani barcha sinflarda haftada 2 soatdan o‘qitish yo‘lga qo‘yiladi. Bu haqda “Sog‘lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to‘g‘risida” 30-oktabr kuni imzolangan Prezident farmonida qayd etilgan.
Farmonda belgilanishicha, 2021-yilda umumta’lim maktablariga 50 ta sport zali qurilishi uchun 100 milliard so‘m, sport ta’lim muassasalariga 48 ta sport inshooti qurilishi uchun 400 milliard so‘m ajratiladi.
2021-yil 10-aprelga qadar 2022—2023-yillarga mo‘ljallangan dastur ishlab chiqilib, shu asosda umumta’lim maktablari sport zallari bilan to‘liq ta’minlanadi, har bir tuman(shahar)da moddiy-texnika bazasiga ega bolalar va o‘smirlar sport maktablari hamda boshqa jismoniy tarbiya va sport muassasalarining sport inshootlari quriladi va jihozlanadi.
Shuningdek, ikki oy muddatda umumta’lim, professional va oliy ta’lim muassasalarida darslar oralig‘ida (katta tanaffus vaqtida) “Sport daqiqasi” jismoniy mashqlari amaliyotga joriy etiladi. Darslar boshlanishidan oldin esa 2 daqiqa nafas olish mashqlari o‘tkaziladi.
Mavzuga doir: O‘zbekistondagi maktablar va oliy ta’lim muassasalarida darslar oralig‘ida jismoniy mashqlar o‘tkaziladi
Uch oy muddatda bolalarning jismoniy rivojlanishini raqamlashtirilgan dastur yordamida monitoring qilish tizimi ishlab chiqiladi.
2021-yil 1-martga qadar tibbiyot xodimlari tomonidan bolalarning sog‘lig‘ini inobatga olgan holda, jismoniy tarbiya bilan shug‘ullanishi ustidan nazorat o‘rnatiladi. Bolalar salomatligi asosida tibbiy-sog‘lomlashtirish guruhlariga ajratilib, shunga qarab jismoniy chiniqtirish miqdori belgilanadi.
Izoh (0)