Ангрен ва Хоразмдаги шакар заводлари оммавий равишда ходимларини ишдан бўшатишни бошлангани ҳақида хабар берилганди.
Бандлик ва меҳнат муносабатлари вазирлиги Давлат меҳнат инспекцияси томонидан ушбу ҳолат бўйича ўтказилган ўрганиш давомида «Ангрен шакар» ва «Хоразм шакар» масъулияти чекланган жамиятларида ишчи ходимлар жамият ташаббуси билан оммавий равишда ишдан бўшатилмаганлиги, шунингдек, коронавирус пандемияси сабабли иш фаолиятини вақтинчалик тўхтатгани, ҳозирги кунда заводни ишга тушириш чоралари кўрилаётганлиги аниқланган. Бу ҳақда вазирлик ахборот хизмати хабар қилди.
Мавзуга доир: Ангрен шакар заводида 150 нафар ходим ишдан бўшатилгани маълум қилинди. Уларнинг сони яна ортиши мумкин
Қайд этилишича, «Хоразм шакар» масъулияти чекланган жамиятида 1081 нафар ишчи билан меҳнат шартномаси расмийлаштирилган бўлиб, ҳозирги кунда 418 нафар ишчи ходимлар корхона ўз иш фаолиятини қайта тиклагунга қадар таъмирлаш ишлари билан шуғулланиб келаётганлиги, фақатгина ўз хоҳишига кўра меҳнат шартномасини бекор қилишни сўраб мурожаат қилган ходимлар ишдан бўшатилганлиги маълум бўлган.
«Ангрен шакар» масъулияти чекланган жамиятида эса ҳозирги кунда 550 нафар ходим бўлиб, 2020 йилнинг июнь ойидан октябрь ойига қадар жами 170 нафар ходим билан тарафларнинг келишувига кўра меҳнат шартномалари бекор қилинган.
Шунингдек, меҳнат шартномасини бекор қилиш билан боғлиқ барча харажатлар ўз вақтида тўлаб берилган. Карантин чекловлари ўрнатилганлиги корхонанинг шакар олди-сотдисига жиддий зарар етказганлиги сабабли жамият фаолиятини 2020 йил июнь ойида тўхтатилиши муносабати билан корхона ходимларининг хоҳишига биноан меҳнат таътиллари ва ўз ҳисобидан таътиллар берилган. 2020 йилнинг сентябрь–октябрь ойлари учун эса ходимларга ўртача ойлик иш ҳақи тўлаб берилган.
Меҳнат кодексининг 102-моддасида иш берувчи камида 2 ой олдин ҳар бир ходимнинг касби, мутахассислиги, малакаси ва меҳнат ҳақи миқдорини кўрсатган ҳолда бўлажак ишдан озод қилиш тўғрисидаги маълумотларни маҳаллий меҳнат органига ҳам маълум қилиши белгиланган бўлиб, ҳозирги кунга қадар Бандлик ва меҳнат муносабатлари вазирлигининг туман бандликка кўмаклашиш марказларига «Ангрен шакар» ва «Хоразм шакар» масъулияти чекланган жамияти ишчилари оммавий равишда ишдан бўшатилаётганлиги тўғрисидаги маълумотлар тақдим этилмаган.
Ўрганиш натижаларига кўра, Давлат меҳнат инспекцияси томонидан ижтимоий тармоқларда эълон қилинган ҳолатларнитп олдини олиш мақсадида «Ангрен шакар» ва «Хоразм шакар» масъулияти чекланган жамияти ишчиларига меҳнат таътилларини ва иш ҳақларини меҳнат қонунчилигига мувофиқ белгиланган тартибда ва ўз вақтида бериш, ходимларни ишдан бўшатишда Меҳнат кодекси талабларига қатъий риоя қилиш бўйича ёзма кўрсатмалар берилган.
Эслатиб ўтамиз, 2020 йилнинг июль ўрталарида Ўзбекистоннинг иккита энг йирик шакар заводи — «Ангрен шакар» ва «Хоразм шакар» хом ашё етишмовчилиги сабабли ишлаб чиқаришни тўхтатиб қўйганди. «Gazeta.uz» маҳаллий ишлаб чиқарувчилар импорт қилувчилар билан рақобат сабабли қийинчиликларга дуч келаётганини ёзганди.
«Ангрен шакар» бош директори Рустам Акбархўжаев ва «Хоразм шакар» бош директори Умиджон Комиловнинг қўшма баёнотида эса янги хом ашё партияси келгунга қадар ускуналарни профилактик тозалаш ишлари олиб борилаётганини таъкидлаганди.
Маълумот учун, «Ангрен шакар» кунига 1000 тонна шакар ишлаб чиқариш қувватига эга, аммо яқин вақтгача ишлаб чиқариш ҳажми 500-600 тоннани ташкил этган ҳамда савдо бир неча тоннагача тушган.
Изоҳ (0)