Rossiyaliklarning taxminan uchdan bir qismi COVID-19 tufayli yangi cheklov choralari kiritilishiga tayyorlanmoqda. Aholining 20 foizi eng zarur mahsulotlarni g‘amlab qo‘yishni boshladi, deb yozadi “RBK” “Yula” e’lonlar agregatori va ResearchMe agentligi tadqiqotlariga tayanib.
So‘rovda qatnashganlarning 12 foizi nooziq-ovqat do‘konlari yopib qo‘yilishidan xavotirlanib, nafaqat eng zarur mahsulotlarni, balki boshqa toifadagi mahsulotlarni ham sotib ola boshlagan.
Kuzda Rossiyaning ba’zi hududlarida yana cheklovlar joriy qilina boshlagach, so‘rov ishtirokchilarining yarmidan ko‘pi (51%) o‘z hududida xaridlarni ko‘proq amalga oshira boshlagan. Ayni paytda respondentlarning 40 foizi tejashni boshlashga majbur qolgan va faqat eng zarur narsalarni sotib olishga harakat qilmoqda.
So‘ralganlarning har o‘n nafaridan biri internetdan ko‘proq mahsulot sotib olishni boshlashni rejalashtirmoqda.
Nashr eslatishicha, bahorda ommaviy cheklovlar kiritilgan paytda oziq-ovqat do‘konlari tarmoqlari va oziq-ovqat yetkazish servislari ba’zi mahsulotlar, shu jumladan yormalar va konservalarga talab oshganini qayd etgan. Do‘konlarda hojatxona qog‘ozi ham tez sotilib keta boshlagan. Hukumat Rossiyada oziq-ovqat va boshqa mahsulotlarning yetarlicha zaxirasi shakllangani tufayli taqchillik xavfi yo‘qligi haqida bir necha marta bayonot bergan edi.
Koronavirusga chalinish holatlari shiddat bilan o‘sib borayotgan bir paytda, Yevropa mamlakatlari birin-ketin karantin choralarini kuchaytirmoqda. Chunonchi, Fransiya qayta tiklayotgan yakkalanish umumiy rejimi doirasida aholining faqat oziq-ovqat sotib olish uchun, ishga borish uchun, tibbiy yoki shoshilinch oilaviy vaziyatlar yuzasidangina o‘z uylaridan chiqishga ruxsat etildi. Germaniyada restoran va barlar, teatr va kinoteatrlar, fitnes markazlari va suv havzalari yopildi. Mehmonxonalar turistlarni qabul qilishni to‘xtatdi, konsertlar esa bekor qilindi. Odamlar uydan tashqarida eng ko‘pi bilan 10 kishigacha yig‘ilishi mumkin. Bu choralar kamida 1-dekabrgacha davom etadi.
Shuningdek, koronavirus bilan bog‘liq vaziyat sababli Chexiya, Sloveniya, Daniya, Ispaniya, Shveysariya va Norvegiyada bir qator cheklovlar joriy qilingani haqida xabarlar berilgandi. Ukraina Vazirlar mahkamasi mamlakatdagi favqulodda holat tartibini 2020-yil 31-dekabrga qadar uzaytirdi.
Izoh (0)