18-oktabr kuni Ozarbayjon Mudofaa vazirligi Armaniston Qurolli kuchlari gumanitar maqsadlarda o‘t ochishni to‘xtatish bo‘yicha yangi rejimni buzganligini ma’lum qildi, deb yozadi “Interfaks”.

Foto: “RBK”

“18-oktabr 00:00 dan boshlab gumanitar maqsadlarda o‘t ochishni to‘xtatish bo‘yicha yangi rejim e’lon qilinganiga qaramay, Armaniston QK yana bir marta bitimni qo‘pol ravishda buzdi. Tun davomida raqib tomondan Jabroil shahar atroflari, shuningdek, ushbu hududdagi istilodan ozod etilgan Araz daryosi bo‘ylab joylashgan qishloqlar minomyot va artilleriyadan o‘qqa tutildi. Shaxsiy tarkibda talafotlar yo‘q”, — deyiladi Mudofaa vazirligi xabarida.

Muassasa ma’lumotlariga ko‘ra, Ozarbayjon armiyasi bo‘linmalari munosib javob choralarini ko‘rgan.

Tog‘li Qorabog‘ Mudofaa vazirligi xabar berishicha, Ozarbayjon Qurolli kuchlari 18-oktabr kuni ertalab frontning janubiy yo‘nalishida hujumga o‘tgan.

“Gumanitar maqsadlarda o‘t ochishni to‘xtatish bo‘yicha yangi rejim e’lon qilinganiga qaramay, Ozarbayjon QK yana bir marta bitimni qo‘pol ravishda buzdi. Soat 7:20 ga kelib (Toshkent vaqti bilan 8:20) artilleriyadan foydalanib, raqib manfaatli pozitsiyalarni egallash maqsadida janubiy yo‘nalishda hujum boshladi. Ikkala tomon ham talafot ko‘rmoqda, halok bo‘lganlar va yaradorlar bor”, — deyiladi Qorabog‘ Mudofaa vazirligi xabarida.

Ikki tomon o‘rtasidagi sulh 18-oktabr kuni mahalliy vaqt bilan yarim tunda (Toshkent vaqti bilan 1:00) amal qilishni boshlagan edi.

Avvalroq Turkiya Tog‘li Qorabog‘dagi mojaroni oldindan rejalashtirganlikda ayblangan edi.

Eslatib o‘tamiz, Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.