Aleksandr Lukashenko namoyishchilarga nisbatan hukumatning javobi kuchaytirilishidan ogohlantirdi

Belarus prezidenti Aleksandr Lukashenko mamlakatda davom etayotgan namoyishlar qatnashchilarini ularning harakatlariga nisbatan kuch tuzilmalarining javobi kuchaytirilishidan ogohlantirdi. Bu haqda “Interfaks” xabar berdi.

“Bugun temiryo‘lga chiqayotganlar, elektr uzatish tarmoqlariga fashistlar bayrog‘ini ilayotganlar, bir so‘z bilan aytganda, bugun davlat infratuzilmasini buzishga, beqarorlashtirishga urinayotganlar bilishi kerak: bugundan boshlab, ayniqsa, ular yashirinayotgan kvartiralarda biz hech kimni asirga olmaymiz”, — deya ma’lum qilgan Lukashenko.

“Agar kimdir harbiy xizmatchiga teginsa (men allaqachon bu haqda generallarga ko‘rsatma berdim), u o‘sha joydan kamida qo‘lsiz ketishi kerak. Men buni barcha bizning bundan keyingi qat’iyligimizni bilishi uchun ochiq gapiryapman. Biz hech qayerga chekinmaymiz va chekinishni rejalashtirmayapmiz. Kim tayyor bo‘lsa, harakatni boshlaymiz”, — deya ta’kidlagan Belarus prezidenti.

Lukashenkoning fikricha, ruxsat etilmagan namoyishlarning tashkilotchilari va ishtirokchilari “rangli inqiloblar qo‘llanmasining yetti yoki sakkizta bosqichidan o‘tgan va so‘nggi — radikallashish deya tavsiflanadigan bosqichga yetib kelgan”.

Shu munosabat bilan prezident “chivin burnini suqmasligi uchun chiroyli harakat qilish kerak”, deb hisoblaydi. “Biz bugun vakuumda yashamayapmiz. Bu o‘tgan asrning o‘rtasi emas. Zamon o‘zgardi va siz buni yaxshi ko‘rib va bilib turibsiz. Faqatgina temir iroda va sabrga ega bo‘lgan kishi g‘olib chiqadi”, — deya ta’kidlagan Lukashenko.

Belarusda uch oydan buyon 9-avgustda bo‘lib o‘tgan prezidentlik saylovi natijalariga qarshi namoyishlar bo‘lib o‘tmoqda. Saylovda amaldagi prezident Aleksandr Lukashenko g‘olib deb e’lon qilingan, u mazkur lavozimni 1994-yildan buyon egallab kelmoqda. Namoyishlar qatnashchilari rasmiylar tomonidan e’lon qilingan saylov natijalarini tan olmayapti va ularni soxtalashtirilgan deb hisoblamoqda.

Namoyishlar asosan yakshanba kunlari bo‘lib o‘tmoqda va faqat Minskning o‘zida ko‘chalarga yuz minglab odamlar chiqmoqda.

Avvalroq Aleksandr Lukashenko Belarusdagi namoyish qatnashchilarini terrorizm yo‘liga o‘tganlikda ayblagandi.