Yangi Zelandiya bedavo kasalliklarga chalingan odamlar uchun evtanaziyani qonuniylashtirishni yoqlab ovoz berdi, deb yozadi TJournal referendumning dastlabki natijalariga tayanib. Bunga fuqarolarning 65 foizdan ortig‘i ovoz bergan. Yakuniy natijalar 6-noyabr kuni e’lon qilinadi.
Qonun ko‘pi bilan olti oy umri qolgan, voyaga yetgan yangi zelandiyaliklarga evtanaziyani o‘tkazish imkonini beradi. Uni davolovchi shifokor va mustaqil tibbiy mutaxassis bemorga bosim o‘tkazilmayotgani va u o‘zi anglagan holda buni tanlayotganiga ishonch hosil qilib, ma’qullashi kerak.
Agar aholining ko‘pchiligi evtanaziya uchun ovoz bersa, qonun yakuniy natijalar e’lon qilinganidan keyin 12 oy o‘tib — 2021-yil noyabrida kuchga kiradi.
Referendumda, shuningdek, marixuanani qonuniylashtirish masalasi ham ko‘tarildi, ko‘pchilik — 53 foizdan ziyod odam unga qarshi ovoz berdi, 46 foiz aholi uni ma’qulladi.
Ammo ko‘pchilik ma’qullagan taqdirda ham, qonun avtomatik tarzda kuchga kirmaydi. Hukumat tegishli qonun loyihasini kiritishi, shundan so‘ng u jamoatchilik muhokamasiga qo‘yilishi kerak bo‘ladi.
Bunda 20 yoshga to‘lgan yangi zelandiyaliklar litsenziyalangan nuqtalarda 14 grammgacha kannabis sotib olishi, uni maxsus joylarda yoki uyda qabul qilishi, shuningdek, ko‘pi bilan ikkita yoki bitta oilaga to‘rttagacha o‘simlik o‘stirishi ko‘zda tutilgan. Qayt etilishicha, bunda gap tibbiy marixuana haqida bormayapti — u mamlakatda 2018-yildayoq qonuniylashtirilgan.
Avvalroq Ukrainadagi yalpi ijtimoiy so‘rovda tibbiy marixuananing qonuniylashtirilishini 70 foiz ishtirokchi qo‘llab-quvvatlagan edi.
Ma’lumot uchun, evtanaziya — har xil harakatlar yoki qurollar bilan, hayotini sun’iy yo‘l bilan ushlab turgan asboblarning ishini to‘xtatish yo‘li bilan bemorning o‘z o‘limini tezlatish haqidagi iltimosini qanoatlantirishdir. Odatda bedavo kasallikka chalingan va buning natijasida chidab bo‘lmas azob chekayotgan insonlarning iltimosiga binoan amalga oshiriladi. Uning ikki turi bor — faol va passiv, ayni vaqtda passivini yana ikki turga — ixtiyoriy va majburiyga ajratish mumkin. Jahonning bir qator davlatlarida evtanaziyaga rasman ruxsat berilgan; O‘zbekistonda huquqiy maqomi noma’lum.
Izoh (0)