Қорабоғ ҳудудидаги можарода Озарбайжон Қуролли кучлари таркибида туриб жанг қилган суриялик Меҳред Муҳаммад Алшхер тан олинмаган Тоғли Қорабоғ республикаси Мудофаа армияси ҳарбий хизматчилари томонидан асирга олинди, деб хабар беради «Интерфакс».
«Асирга олинган шахс асли Хама шаҳри фуқароси ҳисобланади», — дейилади тан олинмаган республика Мудофаа вазирлиги матбуот хизматининг хабарида.
Сўроқ пайтида суриялик асир 19 октябрь куни 250 нафар ёлланма жангчи билан Қорабоғдаги можаро зонасига келганликларини билдирган.
«Бизга 2 минг доллар ваъда қилишди, аммо ҳали қўлимизга олмадик. Бизни бу ерда турклар олиб келди. Жароҳат олганимдан сўнг мени ташлаб кетишди. Олд қаторда биз борамиз, ундан кейин иккинчи линия ва улардан сўнг озарбайжонлик ҳарбийлар. Қорабоғга келгунимга қадар йиғинларда қатнашганман, биз билан турк инструкторлари ишлаган», — дея сурияликнинг сўзларини келтиради матбуот хизмати.
Шунингдек, маълумотларига кўра, Туркия қуролли кучлари томонидан қўллаб-қувватланган Суриядаги мухолифат гуруҳларидан бирининг етакчиси Ҳусайн Або 28 октябрь куни Тоғли Қорабоғ можароси зонасида ҳалок бўлган.
Таъкидланишича, Қорабоғдаги можаро зонасига Туркия томони билан биргаликда суриялик ёлланма жангчиларни жалб этиш билан шуғулланган Або арман авиацияси томонидан амалга оширилган зарбалар оқибатида ҳалок бўлган.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Изоҳ (0)