Rossiyalik tinchlikparvarlarning kiritilishi Tog‘li Qorabog‘dagi nizoning “optimal yechimi”ga aylanishi mumkin. Bu haqda Armaniston bosh vaziri Nikol Pashinyan The Daily Telegraph gazetasiga bergan intervyusida aytib o‘tdi, deb yozadi “RBK”.
“Men Rossiya tinchlikparvarlari nizo hududiga kiritilishi tarafdoriman”, — dedi Pashinyan.
Ayni vaqtda u Rossiya tinchlikparvarlarining bu mintaqaga joylashtirilishini nizoning barcha tomonlari ma’qullashi kerakligini qo‘shimcha qildi.
Oktabr o‘rtalarida Rossiya tashqi ishlar vaziri Sergey Lavrov Armaniston va Ozarbayjon vakillari muhokama qilgan oxirgi kelishuvlar Tog‘li Qorabog‘ga tinchlikparvarlarni kiritishni o‘z ichiga olishini aytgandi. Vazirning so‘zlariga ko‘ra, ular “jangovar harakatlar qayta boshlanmasligini” kafolatlagan bo‘lar edi.
O‘z navbatida Armaniston tashqi ishlar vaziri Zoxrab Mnatsakanyan tinchlikparvarlarni kiritish masalasini “o‘ta muhim masalalardan biri” deb atadi. Uning aytishicha, bu mintaqada o‘t ochishni to‘xtatish rejimini mustahkamlashga va saqlashga yordam beradi.
Ozarbayjon prezidenti Ilhom Aliyev dastlab, 15-oktabrda, Qorabog‘ga tinchlikparvarlarni kiritish haqida gapirishga hali erta ekanligini aytgan bo‘lsa, keyinroq, 22-oktabrda, Ozarbayjon xalqaro kuzatuvchilar kiritilishini rad etmasligini, ammo muzokaralar chog‘ida bu masala jiddiy muhokama qilinmaganini aytgandi.
Armaniston tinchlikparvarlarning, xususan, ular rossiyalik bo‘lsa ham Qorabog‘ nizosiga aralashuviga qarshi emasligi haqida Armaniston bosh vaziri Nikol Pashinyan avval ham ma’lum qilgan edi.
Avvalroq Ozarbayjon prezidenti Ilhom Aliyev Tog‘li Qorabog‘ hududining Ozarbayjon kuchlari egallagan bir qismida muvaqqat maxsus ma’muriyat tuzish haqida buyruq imzolagani xabar berildi.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan uchta urinishga qaramasdan, 27-sentabrdan buyon davom etmoqda.
Izoh (0)