Россияликларнинг тахминан учдан бир қисми COVID-19 туфайли янги чеклов чоралари киритилишига тайёрланмоқда. Аҳолининг 20 фоизи энг зарур маҳсулотларни ғамлаб қўйишни бошлади, деб ёзади «РБК» «Юла» эълонлар агрегатори ва ResearchМе агентлиги тадқиқотларига таяниб.
Сўровда қатнашганларнинг 12 фоизи ноозиқ-овқат дўконлари ёпиб қўйилишидан хавотирланиб, нафақат энг зарур маҳсулотларни, балки бошқа тоифадаги маҳсулотларни ҳам сотиб ола бошлаган.
Кузда Россиянинг баъзи ҳудудларида яна чекловлар жорий қилина бошлагач, сўров иштирокчиларининг ярмидан кўпи (51%) ўз ҳудудида харидларни кўпроқ амалга ошира бошлаган. Айни пайтда респондентларнинг 40 фоизи тежашни бошлашга мажбур қолган ва фақат энг зарур нарсаларни сотиб олишга ҳаракат қилмоқда.
Сўралганларнинг ҳар ўн нафаридан бири интернетдан кўпроқ маҳсулот сотиб олишни бошлашни режалаштирмоқда.
Нашр эслатишича, баҳорда оммавий чекловлар киритилган пайтда озиқ-овқат дўконлари тармоқлари ва озиқ-овқат етказиш сервислари баъзи маҳсулотлар, шу жумладан ёрмалар ва консерваларга талаб ошганини қайд этган. Дўконларда ҳожатхона қоғози ҳам тез сотилиб кета бошлаган. Ҳукумат Россияда озиқ-овқат ва бошқа маҳсулотларнинг етарлича захираси шакллангани туфайли тақчиллик хавфи йўқлиги ҳақида бир неча марта баёнот берган эди.
Коронавирусга чалиниш ҳолатлари шиддат билан ўсиб бораётган бир пайтда, Европа мамлакатлари бирин-кетин карантин чораларини кучайтирмоқда. Чунончи, Франция қайта тиклаётган яккаланиш умумий режими доирасида аҳолининг фақат озиқ-овқат сотиб олиш учун, ишга бориш учун, тиббий ёки шошилинч оилавий вазиятлар юзасидангина ўз уйларидан чиқишга рухсат этилди. Германияда ресторан ва барлар, театр ва кинотеатрлар, фитнес марказлари ва сув ҳавзалари ёпилди. Меҳмонхоналар туристларни қабул қилишни тўхтатди, концертлар эса бекор қилинди. Одамлар уйдан ташқарида энг кўпи билан 10 кишигача йиғилиши мумкин. Бу чоралар камида 1 декабргача давом этади.
Шунингдек, коронавирус билан боғлиқ вазият сабабли Чехия, Словения, Дания, Испания, Швейцария ва Норвегияда бир қатор чекловлар жорий қилингани ҳақида хабарлар берилганди. Украина Вазирлар маҳкамаси мамлакатдаги фавқулодда ҳолат тартибини 2020 йил 31 декабрга қадар узайтирди.
Изоҳ (0)