Germaniya kansleri Angela Merkel mamlakatda qaytadan karantin joriy etilishini ma’lum qildi. Cheklovlar 2-noyabrdan boshlab kuchga kiradi va kamida dekabr oyigacha davom etadi. Bu haqda Meduza xabar berdi.

Foto: Reuters

Germaniyada restoran va barlar, teatr va kinoteatrlar, fitnes markazlari va suv havzalari yopiladi. Mehmonxonalar turistlarni qabul qilishni to‘xtatadi, konsertlar esa bekor qilinadi. Odamlar uydan tashqarida eng ko‘pi bilan 10 kishigacha yig‘ilishi mumkin.

Germaniyada koronavirusning birinchi to‘lqini vaqtida yopilgan maktablar va bolalar bog‘chalari hozircha o‘z ishini davom ettiradi.

“Bizning sog‘liqni saqlash tizimimiz bugun bu muammo bilan kurasha oladi, biroq infeksiya bu tezlikda tarqalsa, tizim bir necha haftada o‘z imkoniyatlarining chegarasiga yetib borishi mumkin”, — deya ma’lum qilgan Angela Merkel.

Germaniyada pandemiya boshidan buyon koronavirus bilan kasallanish bo‘yicha 472 531 ta holat qayd etilgan. So‘nggi bir sutka ichida mamlakatda kasallanish bilan bog‘liq qariyb 15 mingta yangi holat aniqlangan. Kasallanganlarning qariyb 332 ming nafari tuzalgan, 10 196 kishi vafot etgan.

Avvalroq koronavirus bilan bog‘liq vaziyat sababli Chexiya, Sloveniya, Daniya va Ispaniyada bir qator cheklovlar joriy qilingani haqida xabarlar berilgandi.