Apple kompaniyasi Xitoydagi savdolar 2014-yildan buyon kuzatilgan eng past darajaga tushib ketganini ma’lum qildi. iPhone ishlab chiqaruvchining Xitoydagi daromadi iyuldan sentabrga qadar 2019-yilning mos davriga nisbatan 29 foizga tushib ketib, 7,95 milliard dollarni tashkil etdi, deb xabar beradi “RBK”.
Bu kabi pasayish kompaniya aksiyalari qiymatiga ham ta’sir ko‘rsatdi — 29-oktabr kungi kotirovkalarda Apple 4,21 foiz yo‘qotgan, bu kompaniyaning bozordagi qiymatini salkam 83 milliard dollarga tushirib yubordi.
Apple biznesi uchun muhim mintaqalardan biri hisoblanuvchi mamlakatdagi bu kabi savdo natijalari investorlarni xavotirga solib qo‘ygan. Bozordagilarning hisoblashicha, texnologik gigant raqobatda mahalliy ishlab chiqaruvchilarga yutqazib qo‘ymoqda.
Kompaniyadagilar esa bu kabi pasayishni iPhone 12’ning taqdimoti kechikkani bilan izohlamoqda. Apple odatda o‘zining yangi modellarini uchinchi chorakda taqdim etadi. Biroq 2020-yilda pandemiya kompaniyaning yetkazib berish zanjirini buzib yuborgan va taqdimotni oktabr ko‘chirishga majbur bo‘lgan.
Bloomberg’ning yozishicha, pandemiyaga qadar ham Apple 5G imkoniyatiga ega smartfonlarni yaratishda boshqa raqobatchilariga qaraganda sekinroq harakat qilgan. Samsung, Huawei va Xiaomi kabi kompaniyalar 5G aloqa tarmog‘ini qo‘llab-quvvatlaydigan qurilmalarni 2019-yilda taqdim etgan. 2020-yilda esa shu kabi texnologiyaga ega hamyonbop smartfonlar seriyasi paydo bo‘la boshladi. Bularning barcha Apple o‘z qurilmalarni taqdim etgunga qadar sodir bo‘lgan.
Strategy Analytics tadqiqot kompaniyasining ma’lumotlariga ko‘ra, beshinchi avlod aloqa tarmog‘iga ega smartfonlar savdosi bo‘yicha Samsung kompaniyasi Galaxy S20+ bilan yetakchilik qilmoqda. U butun dunyo bo‘ylab sotilgan 5G’ga ega smartfonlardan tushgan daromadning 9 foiziga egalik qiladi. Ikkinchi va uchinchi o‘rinlarni ham Samsung smartfonlari egallagan.
Shunga qaramay, Apple chorak yakunlari bo‘yicha umumiy savdo hajmini 1,03 foizga (64,7 milliard dollarga qadar) oshirishga muvaffaq bo‘lgan. Kompaniya Xitoydagi omadsizligini Mac kompyuterlari (29,2 foiz), iPad planshetlari (46 foiz) savdosi va xizmatlari (16,3 foiz) orqali qoplagan. iPhone savdosi esa 21 foizga — 26,4 milliard dollarga tushib ketgan.
Izoh (0)