Rossiyada sutka davomida 18 283 nafar odamda COVID-19 aniqlandi. Bu mamlakatda qayd etilgan yangi rekord

Rossiyada so‘nggi bir sutka ichida 18 283 ta koronavirus bilan kasallanish holati qayd etildi, deb xabar bermoqda Meduza.

Bu pandemiya boshlanganidan beri sutkalik rekord ko‘rsatkichdir. Avvalgi rekord 29-oktabrda qayd etilgandi. Unda 17 717 ta koronavirus bilan kasallanish holati qayd etilgan.

Rossiyada ushbu kasallik qayd etilganlarning umumiy soni 1 599 976 nafarga yetdi. Ushbu ko‘rsatkich bo‘yicha Rossiya dunyoda to‘rtinchi o‘rinda bormoqda.

Yangi aniqlangan kasallanish holatlarining eng ko‘pi Moskva (+5268 kishi), Sankt-Peterburg (+801), Moskva viloyati (+524), Nijniy Novgorod (+401) va Arxangelsk (+325) viloyatlarida qayd etilgan.

Sutka davomida COVID-19 oqibatida 355 kishi vafot etdi. 29-oktabr kuni Rossiyada koronavirusdan kuniga 366 o‘lim qayd etilgandi. Pandemiya boshlanganidan beri mamlakatda 27 656 kishi vafot etgan.

Shuningdek, bir sutka ichida Rossiyada 14 519 kishi kasallikdan sog‘aygan va ularning umumiy soni 1 200 560 kishiga yetgan. Ma’lum qilinishicha, hozirda Rossiyada koronavirus aniqlangan 371 760 kishi davolanmoqda.

Mamlakatda koronavirusni aniqlash bo‘yicha so‘nggi 24 soat davomida 582 mingta, umumiy hisobda esa 59,8 milliondan ortiq test o‘tkazilgan.

Avvalroq Rossiya Sog‘liqni saqlash vazirligi shifokorlarga koronavirus haqida jamoatchilikka gapirishni taqiqlagani xabar qilingandi.